Шүүмжлэл дагуулсан сошиалийн хууль батлагдлаа

Л.Бямбажав

2023/01/20

Засгийн газраас 2023 оны нэгдүгээр сарын 18-ны өдөр өргөн мэдүүлсэн Олон нийтийн сүлжээнд хүний эрхийг хамгаалах тухай хуулийн төсөл болон хамт өргөн мэдүүлсэн бусад хуулийн төслүүдийг эцсийн хэлэлцүүлгийг хийж, баталаа.

Чуулганы хуралдаанд оролцсон 52 гишүүний 40 нь дэмжив.

Дээрх хуулийг маш богино хугацаанд оруулж ирж баталж буйг улс төрийн намууд болон иргэний нийгмийн байгууллагуудын төлөөлөл эсэргүүцсэн ч ийн баталлаа.

Уг хуулийн хэрэгжилтийн явцад хүний эрхийн зөрчил үүсвэл тухайн заалтуудыг засч залруулах шаардлагатайг УИХ-ын дарга сануулаад улмаар хуулийн хэрэгжилтийг хангах намын бүлгүүдийн хамтарсан ажлын хэсэг байгууллаа.

Энэ хуулийг анх 2017 онд боловсруулсан. Холбогдох байгууллага болон олон улсын байгууллагуудын саналыг хангалттай авсан. ХЭҮК-ынхон ажлын хэсэгт орж, тодорхой саналууд хэлсэн. Цахимаар залилах гэмт хэрэг нэг жилийн дотор 93.8 хувиар, цахимаар хүүхдэд садар самууныг сурталчлах гэмт хэрэг 2.8 дахин өссөн байна. Эдгээр тоо өдөр тутам өссөөр байгаа тул ийм төрлийн гэмт хэргээс урьдчилан сэргийлэх шаардлагатай гэж хууль санаачлагчийн зүгээс тайлбарлав.

Түүнчлэн олон нийтийн дунд шүүмжлэл дагуулсан "Нийтийн албан тушаалтан хүний хувийн мэдээллийг олон нийтийн сүлжээнд зөвшөөрөлгүйгээр нийтлэх, түгээхийг хориглоно" гэсэн 6.3 дахь заалтыг хассан гэсэн тайлбарыг өгөв.

Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна

Шинэ мэдээ