Л.Гантөмөр: Ядуурлыг зогсоох бүх саналыг гаргаж, эрх баригчдаар шийдвэрийг нь гаргуулна

Ардчилсан намын даргаар сонгогдсон Л.Гантөмөрийн цаашид хэрхэн ажиллах төлөвлөгөөг хүргэж байна.

 Ардчиллын алтан зарчим бол олонхоороо шийдэх. Өнөөдөр намын 200 мянган гишүүнээ төлөөлдөг төлөөллийн төв байгууллага нь олонхоороо хуралдаад, олонхоороо шийдвэр гаргалаа. Тийм учраас энэ шийдвэр бол бүрэн гүйцэд гарсан шийдвэр гэж ойлгож болно. Ардчилсан нам өнөөдөр намын даргын бүртгэлгүй байгаа. Намын даргаа бүтгүүлэх ажил хамгийн эхний ажил. Дараагийн ажил сөрөг хүчнийхээ үүргийг сайн гүйцэтгэх. Монголчуудаа ядуурлаас гаргахын төлөө бид нар чадах чинээгээрээ зүтгэнэ.

Өнөөдөр хуралдсан ҮБХ-ны ээлжит бус хурал бол эвлэрлийн хурал байгаа. Тиймээс эвлэрүүлэх ажлыг хамгийн түрүүнд хийнэ. Ардчилсан нам цаашид нэг нам болж, нэг нам гэдгээ харуулна. Нөгөө талдаа нээлттэй олон түмэн рүүгээ гарна. Хүмүүс дээрээ очно. Багш, Эмч нар дээрээ очно. Ард түмэнтэйгээ ярилцана. Ярилцаад тухайн салбараа манлайлж чадаж байгаа хүмүүсээ бид, Монгол төрийн түшээгээр нэрийг нь дэвшүүлээд явна.

Сөрөг хүчин маш сул байгаа гэсэн шүүмжлэлд ямар хариулт өгөх вэ?

 Эрх баригч намтай бид сөрөг хүчний хувьд бодлогын уралдаанд орж байгаа гэсэн үг. Сөрөг хүчин гэдэг бол болохгүй байгаа зүйлийг зогсоох үүрэгтэй. Монголд хамгийн их болохгүй байгаа зүйл ядуурал байна. Ядуурлыг зогсоох бүх саналыг гаргаж, эрх баригчдаар шийдвэрийг нь гаргуулна.

Та С.Эрдэнэ даргаас хараат бусаар ажиллаж чадах уу?

 Ямар ч байсан С.Эрдэнэ дарга, Ц.Элбэгдорж ерөнхийлөгчтэй ярилцаад явна. Ардчилсан нам тарж бутраад их цөөхүүлээ болчихлоо. Ардчилсан намын төлөө байгаа, Монголын ардчиллын төлөө байгаа, ардчиллаа аваръя гэж байгаа бүх хүнийг эгнээндээ нэгтгээд явах тийм л бодлогыг хэрэгжүүлнэ.