С.Эрдэнэ, Х.Баттулга, Ц.Элбэгдорж, Н.Алтанхуяг, З.Энхболд нар эв нэгдлийн ажлын хэсэг байгуулжээ

УИХ дахь Ардчилсан бүлэг өнөөдрийн хуралдаанаа өргөтгөсөн байдлаар хийсэн байна. Энэ талаар бүлгийн дарга О.Цогтгэрэл "АН-ын бүлэг өнгөрсөн долоо хоногт Ардчилсан намын Эв нэгдлийг хангах ажлын хэсэг байгуулах шийдэлд хүрсэн. Өнөөдөр энэ асуудлыг үргэлжлүүлэн хэлэлцлээ. Ардчилсан намын эв нэгдлийг хангах ажлын хэсэг 39 хүний бүрэлдэхүүнтэй, зөвлөх багтай. Ажлын хэсгийн даргаар Ж.Батсуурь гишүүн ажиллаж байгаа. Ажлын хэсэг шахуу даалгавартай ажиллана" гэлээ. 

 Дараа нь АН-ын Эв нэгдлийг хангах ажлын хэсгийн ахлагч Ж.Батсуурь " 2020 оны сонгуульд АН амжилт багатай оролцсон. Сонгуулийн дараа АН-ыг шинэчлэх үйл явц үргэлжлэх үед ковид гэдэг өвчин гарч, орон даяар цахим хурал уулзалт болж хугацаа алдсан. АН-ын цахим, цаасан сонгууль болсон. Энэ бүх үйл явдлыг Улсын дээд шүүх дээр бүртгүүлэх ёстой. Өнөөдөр АН-ын долоон удаагийн хүсэлт Улсын ДЭЭД ШҮҮХЭЭС буцсан байна. Иймээс бид бодит нөхцөл байдалтай эвлэрэх ёстой. Дараагийн сонгууль хүртэл 1,5 жил, өөр улс төрийн нөхцөл байдлыг үгүйсгэх аргагүй. Энэ ондоо багтааж АН ээдрээтэй, хүлээн зөвшөөрөхгүй байгаа бүх асуудлаа шийдвэрлэнэ. 200 гаруй мянган гишүүдийн эрх ашигт нийцсэн дүрэм журмуудаа боловсруулж, намын удирдлагууддаа уламжилна. Энэ ажлын хэсэгт С.Эрдэнэ, Х.Баттулга, Ц.Элбэгдорж, Н.Алтанхуяг, З.Энхболд нар оролцож байгаа" гэлээ. 

 УИХ-ын гишүүн асан С.Баярцогт: Би намын эв нэгдлийг хангах ажлын хэсгийн 39 гишүүний нэг. Намын эв нэгдлийг хангах, удирдлагыг бүртгүүлэх үйл ажиллагаанд идэвхтэй оролцоно. Манай нам Монгол Улсад ардчилал шинэчлэлийг авчирсан, 200 гаруй гишүүнтэй том нам. Манайд намыг аваад явах маш олон лидер залуус байгаа. Тиймээс манай намын удирдлагын асуудал бүрэн нээлттэй байгаа" гэсэн байр суурийг илэрхийлэв.