"Бидний Цөөхөн Монголчууд" Солонгост 2023

"Ядамын Мөнхчулуун" сан, МҮОНРТ, Юнител группээс хамтран 21-р зууны нүүдэлчдийн ахуй амьдрал, онгон дагшин байгаль, тэдгээрийн хоорондын шүтэлцээ уламжлалт ёс зан заншил, биет болон биет бус соёлын өв, Монгол угсаатны онцлог өнгө төрхийг орчин үеийн техник технологиор баримтжуулж, мэдээллийн цогц архив бий болгож хойч үедээ өвлүүлэн үлдээх зорилготой "Бидний Цөөхөн Монголчууд" төслийг 2017 оны 03 сарын 02-ны өдрөөс эхлүүлэн амжилттай хэрэгжүүлээд ажиллаж байна.

Өнөөдрийн байдлаар бид Монгол улсын 8 аймагт хүрч ажилласны дээр МУ-ын ГХЯ-тай хамтран ОХУ-ын Өвөр байгалийн хязгаар нутаг,  Халимаг, Тува, Буриад, Агын тойрог,  Москва хот, БНХАУ-ын ӨМӨЗО-ны Баяннуур аймаг, Хөххот, Япон улсын 7 хот, мужуудад  тус тус хүрч энэ цагийн нэгдсэн түүхэн архивтаа хамруулсан билээ.
  
Манай бүтээлүүд олон нийтэд нээлттэй байх зорилгын хүрээнд хоёр удаагийн нийт 1,200 гэрэл зургийн үзэсгэлэнг гаргаж хамтын ажиллагааны хүрээнд олон улсад Монгол улсыг сурталчилан таниулах зорилгоор Гадаад Харилцааны Яаманд тухай бүрт нь хандивлаж ирсэн, үндэсний газар зүйн мэдлэгийг өргөжүүлж, түгээн дэлгэрүүлэх зорилготой шинжлэх ухаан, боловсролын “National Geographic” байгууллагатай хамтарсан  англи, монгол тайлбартай анхны гэрэл зургийн номоо хэвлүүлж цахим сүлжээ,  “Бидний Цөөхөн Монголчууд” телевиз ,  МҮОНРТ болон бусад телевизийн сувгуудаар   контентуудаа тасралтгүй олон нийтэд хүргэж ирсэн.

“Бидний Цөөхөн Монголчууд” төсөл нь цар тахлын улмаас хэсэг хугацаанд завсарласны дараа 2023 оныг төслийн зүгээс Солонгосын жил, БНСУ-д бүхэлд нь зориулах зорилго тавин бэлтгэл хангаж байна. БНСУ-д оршин суугаа нийт Монгол туургатан иргэдэд хүрч нэг жилийн хугацаанд ажиллахаар төлөвлөөд байна. БНСУ-д ажиллах хугацаанд нийт 27,000 километр орчим  замыг туулж монголчууд хамгийн ихээр төвлөрсөн томоохон 9 муж хот, тэдгээрийн дагуул хот тосгодод 4 улирлын туршид 180 хоногт 8 хүний бүрэлдэхүүнтэй, нийт 500 орчим гэр бүл, иргэд, төрийн болон олон нийтийн байгууллагуудтай уулзаж "Зоригтын цаг", "Их Нүүдэл", "Баярлалаа Камсахамнида", "Монгол зүрхтэй Жангум" зэрэг баримтат болон урлаг уран сайхны болон шууд дамжуулалтын нэвтрүүлэгүүд, мөн "Бидний Цөөхөн Монголчууд" Солонгост гэрэл зургийн ном, гэрэл зургийн үзэсгэлэн, цахим фото зураг зэргээр олон нийтэд хүргэж түүхчлэх болно.