“Чингэлтэйд үйлдвэрлэв-2022” үйлдвэрлэл эрхлэгчдийн чуулга уулзалт боллоо

Чингэлтэй дүүрэг үүсэн байгуулагдсаны 30 жилийн ойн хүрээнд дүүргийнхээ иргэд, аж ахуй нэгжүүдийг оролцуулсан олон арга хэмжээг зохион байгуулж байгаа билээ. Үүний нэг нь өнөөдөр зохион байгуулагдсан “ЧИНГЭЛТЭЙД ҮЙЛДВЭРЛЭВ-2022” үйлдвэрлэл эрхлэгчдийн чуулга уулзалт юм.

Чуулга уулзалтад Чингэлтэй дүүрэгт худалдаа, үйлдвэрлэл эрхэлж буй 350 гаруй жижиг дунд үйлдвэрлэл эрхлэгч оролцож, төрөөс үзүүлж буй бодлогын дэмжлэг, хууль эрх зүйн зохицуулалтууд болон тулгамдаж буй асуудал, жижиг, дунд үйлдвэрлэлийн цаашдын чиг хандлагыг хэлэлцсэн юм.

Уулзалтыг нээж Чингэлтэй дүүргийн Засаг дарга Н.Батсүмбэрэл хэлэхдээ “Чингэлтэй дүүрэг жижиг дунд үйлдвэрлэл эрхлэгчдийг үргэлж дэмжсээр ирсэн. Цаашид тэдэнд тулгамдаж буй асуудлыг шийдвэрлэхэд төр, хувийн хэвшлийн хамтын ажиллагааг гүнзгийрүүлэх, үйлдвэрлэл эрхлэгчдийн санаа бодлыг үйл ажиллагааныхаа чиглэлд тусгахаар идэвхтэй ажиллах болно. Сүүлийн жилүүдэд Монгол Улсад жижиг, дунд үйлдвэрлэл жинхэнэ утгаараа хөгжиж байгааг экспертүүд хэлж байна.
Манай дүүргийн хувьд Жижиг, дунд үйлдвэрлэлийг дэмжих төвд өнөөдрийн байдлаар 815 үйлдвэрлэл эрхлэгч бүртгэлтэй байна. Дүүргийн Засаг даргын хувьд үйлдвэрлэл эрхлэгчдээ дэмжиж, үйл ажиллагаагаа өргөтгөхөд нь чиглэсэн шинэ технологийг хэрэгжүүлэх, бодлогын туслалцаа үзүүлэх, менежментийн шинэ арга барилыг тусгах зэргээр цаашид анхаарч ажиллана” гэж онцоллоо.

Мөн Засаг даргын үйл ажиллагааны хөтөлбөрийг хэрэгжүүлэх хүрээнд Чингэлтэй дүүргийн Иргэдийн Төлөөлөгчдийн хурлаас 2021 онд “Чингэлтэйд үйлдвэрлэв-2024” арга хэмжээг дөрвөн зорилтын хүрээнд 26 үйл ажиллагаатай баталсан байдаг. Энэ хүрээнд шат дараалсан арга хэмжээнүүдийг тогтмол зохион байгуулж байгаа юм.

Уулзалтад “Төрөөс жижиг, дунд үйлдвэр эрхлэгчдэд үзүүлж байгаа бодлогын дэмжлэг ба өнөөгийн байдал” болон “Жижиг дунд үйлдвэрлэл эрхлэгчдэд тулгамдаж буй асуудал ба гарц шийдэл” сэдвээр хэлэлцүүлгүүд болж, Нийслэлийн Жижиг дунд үйлдвэр үйлчилгээг дэмжих дэмжих төв ТӨҮГ-ын дарга Г.Гангамөрөн, Зээл, төслийн хэлтсийн дарга Н.Энхтөр, Зээлийн батлан даалтын сангийн ахлах мэргэжилтэн М.Баярмаа нар илтгэл тавьж, панел хэлэлцүүлгийг зохион байгууллаа.

Чуулганы үеэр жижиг, дунд үйлдвэрлэл эрхлэгчдийн бүтээлээр загварын үзүүлбэр үзүүлж, үйлдвэрлэл эрхлэгчдэд дүүргийн Иргэдийн Төлөөлөгчдийн Хурлын дээд шагнал “Чандмань одон”, “Хүндэт өргөмжлөл”, Засаг даргын “Хүндэт тэмдэг”-ээр шагналаа.