Шууд асууя: Нүүрсний хулгайн жинхэнэ, том эздийг АТГ илрүүлж чадах уу?

Нүүрсний  хулгайг шалгах Засгийн газрын ажлын хэсэгт АТГ-ын Дэд дарга Г.Азжаргал багтаж буй. Түүнээс зарим мэдээллийг тодрууллаа.

-Нүүрсний хулгайн хэрэг анх 2011 онд шалгагдаж, маш их хэмжээний нүүрс дутсан байсан. Гэтэл хэрэг хаагдсан байгаа нь анхаарал татаж байна. Хуулийн байгууллага яагаад анхаараагүй юм бол?

-2017 оноос өмнө шалгагдаж байсан Эрүүгийн хэргүүдийг хэрэгсэхгүй болгосон асуудлыг эргэж сөхөн шалгаж байна. Нүүрс олборлох, тээвэрлэлттэй холбоотой 20-иод хэрэг бий. 

-Хил дээр төрийн таван байгууллага бий. Төрийн албаны оролцоогүйгээр /17 мянган удаа гарсан/ ийм хулгай гарах боломжгүй. Танай байгууллага яагаад юу ч хийсэнгүй вэ?

-Бүртгэлтэй байгаа. Тэд бүгд шалгагдана.

-Одоо хулгайн нүүрс гарсаар байгаа юу?

-Гарахгүй байгаа гэж би бодож байна.

-Та бүхэн жижиг хүмүүс, албан тушаалтнуудыг шалгадаг. Ордонд сууж буй төрийн өндөр албан тушаалтнуудыг шалгаж чадахгүй байна шүү дээ?

-Жижиг, доод гэж ялгаж болохгүй. Хуулийн хэллэгээр улс төрд нөлөө бүхий этгээд гэж бий. Гэхдээ Үндсэн хуулиар бүгд ижил тэгш эрхтэй. Шалгах шаардлагатай бол шалгана. Мөнгө мөрөө үлдээдэг. Эцсийн өмчлөгч гэж асуудал ч бий. Тухайн мөнгө орсон компанийг хамаарал бүхий этгээдээр дамжуулж хариуцлагатай шалгах байх гэв.