"ЭРДЭНЭС ТАВАНТОЛГОЙ" ХК МОНГОЛ УЛСАД АНХ УДАА НИЙЦЛИЙН МЕНЕЖМЕНТИЙН ТОГТОЛЦОО, АВЛИГЫН ЭСРЭГ МЕНЕЖМЕНТИЙН ТОГТОЛЦООНЫ СТАНДАРТЫГ НЭВТРҮҮЛЛЭЭ

“Эрдэнэс Тавантолгой” ХК Монгол Улсад анх удаа ISO 37301:2021 Нийцлийн менежментийн тогтолцоо, ISO 37001:2016 Авлигын эсрэг менежментийн тогтолцооны хоёр стандартыг нэвтрүүлж өнөөдөр гэрчилгээгээ гардаж авлаа. 

Дээрх хоёр стандартыг нэвтрүүлэх ажлын хэсгийг энэ онд  байгуулан анхдагч баталгаажуулалтын 1, 2 дугаар шатны аудитыг амжилттай давж, АНУ-ын итгэмжлэлтэй Бүгд найрамдах Энэтхэг улсын QFS Management System LLP болон Их британи, Умард Ирландын Нэгдсэн Вант улсын LMS Certifications Limited байгууллагаас баталгаажиж Монгол Улсад анх удаа энэхүү 2 стандартыг хэрэгжүүлэгч байгууллага болж байна. 

Ингэснээр “Эрдэнэс Тавантолгой” ХК Нэгдсэн менежментийн тогтолцооны 5 стандартыг нэгдсэн тогтолцоогоор нь хэрэгжүүлэгч Монгол улсын анхны компани болж байна. 

Олон улсын стандартын гэрчилгээ гардуулах арга хэмжээнд Бүгд Найрамдах Энэтхэг Улсаас Монгол Улсад суугаа онц бөгөөд Бүрэн эрхт элчин сайд М.П.Сингх, “Эрдэнэс Тавантолгой” ХК-ийн Дотоод хяналт, эрсдэлийн удирдлагын газрын захирал Х.Мөнхжаргал, Монсертф ХХК-ийн захирал Г.Билгүүн болон компанийн төлөөлөл оролцлоо. 

Дээрх стандартуудыг үйл ажиллагаандаа нэвтрүүлснээр НҮБ-ын тогтвортой хөгжлийн зорилго, Монгол Улсын Засгийн газрын “Алсын хараа 2050”, Шинэ сэргэлтийн бодлогыг хэрэгжүүлэх зорилтод хүрэхэд чухал түлхэц болох юм. 

“Эрдэнэс Тавантолгой” ХК 2019 оноос хойш Олон улсын Нэгдсэн менежментийн тогтолцооны ISO 9001:2015 Чанарын менежментийн тогтолцооны стандарт, ISO 14001:2015 Байгаль орчны менежментийн тогтолцооны стандарт, ISO 45001:2018 Хөдөлмөрийн эрүүл мэнд, аюулгүй байдлын менежментийн тогтолцооны стандартыг Франц улсын Афнор группээс баталгаажуулан хэрэгжүүлж ирсэн.  

2021 онд “Эрдэнэс Тавантолгой” ХК болон Монсертф ХХК-тай хамтарсан ажлын хэсэг байгуулан ISO 37301:2021 Нийцлийн менежментийн тогтолцоо стандартыг орчуулан Монголын үндэсний МNS стандарт болгон батлуулсан юм.