Г.Ганчимэг: Аав минь жилийн өмнө “Мөнгөн гүүр” эмнэлэгт өвдөгний үе солиулах ажилбарт орсон ч өмнөхөөсөө дордчихсон

Дорнод аймгийн малчин н.Гансүх өвдөгний үе солиулах заалттай Дорнод аймгаас гэмтлийн эмнэлэгт 13а бичүүлээд ирсэн ч очер нь олон сарын дараа байж. 

2021 оны найман сард "Мөнгөн гүүр" эмнэлэгт өвдөгний үе солиулах мэс засалд оржээ. Эдгэрэлт нь зургаан сар байдаг талаар эмч нь хэлсэн учир өвдөлтөө тоохгүй гүрийж зургаан сар болсон байна. Гэтэл өвдөлт нь намдахгүй, өвдөг нь тэнийхгүй байсаар хагалгаа хийлгэсэн "Мөнгөн гүүр" эмнэлэгтээ ирж үзүүлтэл далийлттай байна гээд, ямар арга хэмжээ авах нь мэдэгдэхгүй байсан учир эмнэлэгт хэвтүүлжээ. 

Эмнэлгээс гаран, эдгэрнэ гэх найдвар тээгээд Дорнод аймаг руу буцсан ч дөрөв дэх удаагаа Мөнгөнгүүр эмнэлгийг зорьж ирээд байгаа нь энэ. Хагалгаа нь амжилтгүй болж, анх үе солихдоо эмч нь алдаа гаргасан гэж охин нь ярьж байна. Харин эмнэлгээс нь аавд чинь мэс засал хийсэн эмч манайд одоо байхгүй гэх тайлбарыг хэлжээ. Огт таяг тулдаггүй, үе нь л өвддөг байсан учир үе солиулах хагалгаанд ороод Гансүх гуай хоёр таягтай, хүнээр түшүүлж явдаг болжээ.