Д.Батлут: Эмнэлгүүд цалингаа тавьж чадахгүй байдалд хүрлээ

Нийгмийн бодлогын байнгын хорооны хуралдаанаар эрүүл мэндийн салбарын гүйцэтгэлийн санхүүжилт, цахим шилжилтийн хэрэгжилтийн талаар Эрүүл мэндийн сайдын мэдээллийг сонсох үеэр УИХ-ын гишүүн Д.Батлут 2, 3 дахь шатлалын эмнэлгүүдийн санхүүжилт тасарсан асуудлыг хөндлөө.

Тэрээр “Эмч нар цалингаа авахын тулд үйлдэл бүрээ цаасан дээр бичих шаардлагыг Эрүүл мэндийн даатгалын Ерөнхий газар тавьж байна. Энэ нь эмч нарт үндсэн ажлынх нь хажуугаар дарамт болж эмнэлгүүд тусламж үйлчилгээндээ биш цаас үйлдвэрлэхдээ л анхаардаг газар болж хувирах нь.

ЭМДЕГ энэ салбарын ажилтнууд, эмнэлгүүдэд ингэж хүндрэл учруулж байгаа атлаа үүргээ биелүүлэхгүй байна. Энэ жилийн 8-р сараас хойш 2 болон 3 дахь шатлалын дийлэнх эмнэлэг санхүүжилтээ аваагүй. Ингээд бодит байдал дээр эмч, ажилтнуудын цалин тасарч, эм, эмнэлгийн хэрэгслээ иргэд гаднаас худалдаж авч байна. Энэ асуудлаа шийд л дээ” гэсэн юм.