О.Цогтгэрэл: Визний нөхцөл хангаж байвал залуучууд гадагшаа дүрвэхийг хүсэж байна

УИХ дахь Ардчилсан Намын бүлгийн хуралдаанаар хэлэлцсэн асуудлын талаар мэдээлэл хийлээ. 

Ардчилсан Намын бүлгийн дарга О.Цогтгэрэл "Улсын төсвийг хэлэлцэж байна. Монгол Улсын эдийн засаг дахь төрийн оролцоо нэмэгдэж байна. Үүнтэй холбоотойгоор төрийн өмчит аж ахуйн нэгжүүдийн нөхцөл байдал, ашигтай ажиллагааны талаар мэдээлэл сонслоо. Дараа нь МАН 2020 онд эдийн засгийн тухайд ямар амлалт өгч байсан, хэрэгжилт нь одоо ямар байгаа талаар мэдээлэл сонслоо.

МАН нийт 702 амлалт өгснөөс эдийн засаг гэсэн бүлэг нь 100 гаруй амлалттай. МАН-ын мөрийн хөтөлбөрийн чухал хэсэг нь Монгол Улсыг өрийн дарамтгүй болгоно гэсэн. Гэтэл өнөөдөр Монгол Улсын нийт өр, Засгийн газрын өр хоёр дахин нэмэгдсэн. Нэг хүнд ногдох өр 30 сая төгрөг боллоо. 2023 онд маш их хэмжээний өр нэмж авах бэлтгэл ажил хангагдаж байна. Газрын тосны үйлдвэр ашиглалтад оруулна гэсэн. Гэтэл энэ төслийн нөхцөл байдал ямар байгаа вэ. Тус төсөл Хөгжлийн банканд 150 тэрбум төгрөгийн өртэй. Яг үйлдвэрийн ажил одоо хүртэл эхлээгүй. ТЭЗҮ нь батлагдаагүй, түүхий эдгүй үйлдвэр. Мега төсөл нэртэйгээр улс орныг өрөнд оруулах томоохон төсөл цаана бойжиж байна. 150 мянган ажлын байр бий болгоно гэсэн. Хаана байна. Харин энэ ажлын байрыг Солонгосчууд бий болгож байх шиг байна. Визний нөхцөл хангаж байвал залуучууд гадагшаа дүрвэхийг хүсэж байна. Ажиллангаа ядуурдаг тогтолцоо бий боллоо" гэв.

УИХ-ын гишүүн С.Одонтуяа "Хөгжлийн Банкны энэ их өр зээлийг бүгдгийг нь АН-ын үе рүү чихэж байна. Сая УИХ нээлттэй сонсгол явуулсан. Энэ сонсголын материалыг Хөгжлийн Банк өөрөө бэлдэж өгсөн. 2012-2016 онд АН тогтвортой нэг удирдлагатай байсан. Харин МАН-ын үед таван жилийн хугацаанд таван дарга солигдсон. Зээл өгсөн хүмүүс нь буруутай" гэв.