Д.Батлут: Төсвөөс татаас өгөх зарчим бол муу менежерийн хийдэг ажил

УИХ 2023 оны төсвийг хэлэлцэж байна. Уг асуудалтай холбоотойгоор УИХ-ын нэр бүхий 19 гишүүн иргэний агаарын тээврийн компаниудад навигацын орлогоос өгөх татаасыг тухайн орон нутагт амьдарч буй иргэдийг зорчих хөдөлгөөнтэй уялдуулан олгох зохицуулалт хийх тогтоолын төслийг санаачлан хэлэлцүүлсэн. Ингэснээр одоо 1 сая гаруй төгрөгийн үнэтэй байгаа онгоцны тасалбарын дийлэнхийг төрөөс татаас хэлбэрээр төлж иргэд 175 мянгаас 202 мянган төгрөгийг нь төлөх юм. 

Хэрэв дээрх тогтоолын төсөл батлагдвал төсвөөс 9.8 тэрбум төгрөгийг татаас хэлбэрээр  иргэний агаарын тээврийн компаниудад олгодог болно.  

Уг асуудлыг УИХ-ын Д.Батлут эсэргүүцэж, тогтоолын төслийг санаачилсан гишүүдтэй мэтгэлцлээ. Тэрээр “Онгоцны тасалбарын үнэ шатахууны өртгөөс шууд хамаарч байгаа. Засгийн газар онгоцны шатахууны үнийг бууруулах зорилгоор “Эрчис ойл” компанийг Монгол газрын тос боловсруулах үйлдвэр ТӨХХК-ийн дэргэд байгуулсан. Энэ компани ОХУ-ын үйлдвэрлэгчдээсшууд худалдан авалт хийдэг болно. Ингэснээронгоцны шатахууны үнэ 30 гаруй хувиар буурна. Дагаад орон нутгийн нислэгийн тасалбар хямдарна. Орон нутгийн нислэг зэрэгт төрөөс татаас олгохын оронд хүүхдүүддээ зориулья л даа. Сургууль цэцэрлэгийн хүүхдүүдийн хоолонд бид маш бага мөнгө зориулж байна. Татаас өгөх зарчим бол хамгийн муу менежерийн хийдэг ажил шүү. Ер нь цаашид агаарын тээврийн салбар дахь төрийн оролцоог багасгахад салбарын сайд нь анхаарч ажилламаар байна” гэсэн юм.