Улирлын томуугийн эсрэг вакцинжуулалт 10 сарын 30-ныг дуустал үргэлжилнэ

Улирлын томуу, томуу төст өвчин улсын хэмжээнд идэвхжлийн түвшинд байна. өнгөрсөн  долоо хоногтой харьцуулахад Говьсүмбэр аймаг идэвхжлийн түвшнээс алаг цоог дэгдэлтийн түвшинд, Дорноговь, Дундговь, Өмнөговь аймгууд улирал хоорондын түвшнээс идэвхжлийн түвшинд шилжсэн байна. 

Томуу, SARS-CoV2 вирус тодорхойлогдоогүй бөгөөд таван сорьцод (8.3 хувь) энтервирус, хоёрт нь (3.3 хувь)-д бокавирус, нэг сорьцод (1.6 хувь) риновирус, нэг сорьцод (1.6 хувь) амьсгалын замын синцитиал вирус илэрсэн талаар  ХӨСҮТ мэдээллээ.
Томуугийн өвчлөл 87.6 хувийг 15, үүнээс 60.3 хувийг  4 хүртэлх насны хүүхдүүдэд бүртгэгджээ. Өмнөх долоо хоногтой харьцуулахад өвчлөл 5-9 хүртэлх насанд 1.4 хувиар нэмэгдэж, бусад насны бүлэгт 0.2-0.7 хувиар буурсан байна.
Эмнэлэгт хэвтэгсдийн 91.4 хувь нь 15 хүртэлх, үүнээс 78.9 хувь нь 4 хүртэлх насныхан бол өмнөх долоо хоногтой харьцуулахад нэг хүртэлх насны хүүхдүүдийн өвчлөл 2.7 хувиар буурч, 1-9 хүртэлх насанд 4.3 хувиар нэмэгджээ.

Засгийн газрын хөрөнгөөр худалдан авсан БНСУ-ын Грийн кросс үйлдвэрийн улирлын томуугийн вакцинаар эцэг эх, асран хамгаалагчийн зөвшөөрлийг үндэслэн 1-5 насны хүүхэд болон эрсдэлт бүлгийн хүн ам, эрүүл мэндийн ажилтныг вакцинжуулах ажлыг өрхийн эрүүл мэндийн төвүүд дээр зохион байгуулж байгааг нийслэлийн Эрүүл мэндийн газраас мэдээллээ. Вакцинжуулалт аравдугаар сарын 30-ныг дуустал үргэлжилнэ.