Иргэд улсын төсвийг хянах гарын авлага гарчээ

  УИХ-ын намрын чуулган нээлтээ хийгээд удаагүй байна. Намрын чуулганы нэн тэргүүний ажил Монгол улсын ирэх жилийн улсын төсвийг хэлэлцэн батлах явдал юм. Энэ удаагийн чуулган эрх баригчдын мөрийн хөтөлбөрийг хэрэгжүүлэхэд чиглэж буйг УИХ-ын дарга онцолсон. Төсвийн хэлэлцүүлэг анхнаасаа л хэл ам дагуулж эхлээд байгаа. 2023 оны төсөв аймгуудыг алагчилсан төсөв ч гэж нэрлэгдээд байгаа юм.

Сангийн сайд Б.Жавхлан, Монгол Улсын Засгийн газар ирэх 2023 оны төсвийн бодлогыг төрийн хэмнэлтийг хэрэгжүүлж, “Шинэ сэргэлтийн бодлого”-ыг дэмжих, экспортыг нэмэгдүүлэх, макро эдийн засгийг тогтворжуулахад чиглэсэн.  Мөн 2023 онд шинээр хөрөнгө оруулалт хийхгүй, төрийн өмчийн томоохон газруудад шинээр хийх хөрөнгө оруулалтыг зогсоохоор төсөөлж, харин өнгөрсөн жилүүдэд эхлүүлсэн бүх төслүүдээ ашиглалтад оруулахаар төлөвлөсөн гэж мэдэгдсэн.

 Ийнхүү улсын их хурал 2023 оны төсвийг хэлэлцэн батлах үйл явц өрнөж буй эдгээр өдрүүдэд иргэд төсвийн хэлэлцүүлэгт хэрхэн оролцож, хяналт тавих вэ? гэсэн асуулт гарч ирнэ.

 Нээлттэй нийгэм форум ТББ-аас Улсын төсвийн төлөвлөлтийн шатанд иргэд хэрхэн оролцож, хяналт тавих аргачлалын гарын авлагыг боловсруулжээ. Энэхүү гарын авлагад иргэд хэзээ, хаанаас төсвийн мэдээлэл авч болох, яаж, ямар шалгуураар төсвийг шинжлэх, төсвийн төлөвлөлтийн шатанд хэрхэн оролцож, хяналт тавих аргачлалыг багтаасан байна. Үүнээс гадна Монгол Улсын нэгдсэн төсөв юунаас бүрддэг, яагаад төсөвт олон нийтийн хяналт чухал талаарх ойлголтыг тус гарын авлагаас олж авах боломж бүрджээ. Гарын авлага үзэх холбоос: https://forum.mn/post/121440