Д.Батлут: Монгол Улс нэмж зээл авах хэрэггүй, гадаад өр ДНБ-тэй харьцуулахад 200 хувьд хүрсэн

УИХ-ын чуулганы хуралдаанаар Монгол Улсын 2023 оны төсвийн төслийг хэлэлцэх эсэх асуудлыг хэлэлцэж, гишүүд асуулт тавьж, хариулт авч байна. 

УИХ-ын гишүүн Д.Батлут "2023 онд улсын төсвийг бүрдүүлэхдээ гадаадын зээл тусламжаар тодорхой хувийг нь бүрдүүлнэ гэж тусгасан байна. Ирэх жилийн төсвийн төслийг 1,6 их наядын алдагдалтай байхаар боловсруулсан байна. Монгол Улс ирэх жил бондын эргэн төлөлтөд 1,4 тэрбум ам.доллар, Своп хэлцлийн 2,5 тэрбум ам.долларын эргэн төлөлт хийх ёстой. Гадаад өр ДНБ-тэй харьцуулахад 200 хувьд хүрсэн. Нэмж зээл авах хэрэг бий юу гэж бодох цаг болоод байна. Нэмж авсан зээлээ төлөхөд бэрхшээл тулгарах нь ойлгомжтой. Ингээд улсын зээлжих зэрэглэл буурах эрсдэл дахин үүснэ.

Нөгөө талаар олон улсаас авсан зээлийн хөрөнгө үр ашигтай зарцуулагдаж байгаа эсэхэд үнэлэлт дүгнэлт өгмөөр байна.
Жишээлбэл:
- 2016-2020 онд Хөдөөгийн хөгжлийн төсөлд 50 сая ам.долларын зээл авсан. Хөдөөд бодит хөгжил бий болсон уу?
- БОАЖЯ цөлжилтийг бууруулах чиглэлээр 2016-2026 төсөл хэрэгжүүлэхээр 7,9 сая ам.долларын зээл авсан. Бүх судалгаагаар цөлжилт өгт буураагүй байгаа нь тодорхой гарсан.
- Хүчирхийллийг бууруулах чиглэлээр 5 сая ам.долларын зээл авсан. Хүчирхийлэл буурсан уу?
Зээл авч хэрэгжүүлсэн төслүүдийн үр дүнг үнэлж дүгнэмээр байна" гэсэн юм.