Он гарсаар 15 хүүхэд сураггүй алга болжээ

Цагдаагийн байгууллагад энэ оны эхний 10 сарын байдлаар улсын хэмжээнд 0-18 насны 1009 хүүхэд оршин суугаа газраасаа алга болсон гэж бүртгэгдсэнээс 990 хүүхэд олдож, одоо 15 хүүхэд олдоогүй байна.  Өнөөдрийн байдлаар сураггүй алга болсон хүүхдүүд хаана байгаа нь тогтоогдохгүй байгаа юм.

Насанд хүрээгүй хүүхдийн хувьд гэр бүл, ойр дотнын хүмүүстээ хэлэлгүй найз нөхдөөрөө нэгнийдээ цуглах, хөдөө, орон нутагт зорчдог. Мөн хөгжлийн бэрхшээлтэй хүүхдэд тавих ар гэрийн хараа, хяналт сулаас төөрөх, сураггүй болох зэрэг нөхцөл цагдаагийн байгууллагад түгээмэл бүртгэгдэж байгаа ч нийт алга болсон хүүхдийн дийлэнх хувь нь 24 цагийн дотор олддог.

Цагдаагийн байгууллага иргэдээс ирсэн мэдээллийн дагуу сураггүй алга болсон хүүхдийг байгууллагын нэгдсэн сангаар дамжуулан улсын хэмжээнд шуурхай эрэн сурвалжлах ажиллагааг эхлүүлж, тав хоногийн дотор гомдол гаргагчид мэдэгдэж шийдвэрлэдэг.

Эцэг, эхчүүд хүүхдээ алга болсон гэж цахим сүлжээ ашиглаж түүний зураг, хувийн мэдээлэл зэргийг байршуулах нь тухайн хүүхдийг үеийнхэн нь гадуурхах, дээрэлхэх зэргээр амьдралд нь сөргөөр нөлөөлж байна.

Тийм учраас эцэг, эхчүүдэд анхааруулж хэлэхэд хүүхэд тань алга болсон гэж үзвэл оршин суугаа газрынхаа цагдаагийн байгууллагад биечлэн очиж мэдээлэл өгөх эсвэл 102 тусгай дугаарт мэдэгдэх хэрэгтэй байна.