Мялзангийн вакцины худалдан авалтаар үндэслэлгүй хөрөнгөжсөн даргыг шалгуулж байх зуур, Мялзангийн өвчлөл бүртгэгдсээр байна 

Хөвсгөл аймгийн Их-Уул суманд бог малын мялзан өвчин бүртгэгдсэн гэж  аймгийн Мал эмнэлгийн газраас мэдээллээ. Тус аймгийн Рашаант суманд наймдугаар сарын 31-нд бог малын мялзан өвчин бүртгэгдэж хорио цээрийн дэглэм тогтоожээ.  Харин энэ сарын 15-ны өдөр зэргэлдээ Их-Уул суманд тус өвчний тохиолдол илэрсэн байна.

Хөвсгөл аймгийн Засаг даргын захирамжаар аймгийн нутаг дэвсгэрт бүх төрлийн мал, амьтны орох шилжилт хөдөлгөөнийг энэ сарын 5-ны өдрөөс 2023 оны нэгдүгээр сарын 1 хүртэл түр хориглосон юм.
Мялзан өвчин нь хөрс бэлчээрэр дамжин халдварладаг мал амьтны гоц халдварт өвчин юм. Есдүгээр сарын 5-ны өдрийн байдлаар малын гоц халдварт шүлхий өвчин таван аймгийн найман суманд, мялзан өвчин таван аймгийн 12 суманд, хонины цэцэг өвчин нэг аймгийн нэг суманд, үхрийн арьс товруутах өвчин дөрвөн аймгийн найман суманд тус тус бүртгэгдсэн байна.  

Тиймээс малын халдварт өвчнийг нийслэлд нэвтрүүлэхгүй байх чиглэлийн бүхий л арга хэмжээг НОБГ-аас зохион байгуулан ажиллаж байгаа юм байна.

Мал амьтны халдварт өвчнөөс урьдчилан сэргийн ажлыг зохион байгуулах үүрэгтэй, Мал эмнэлгийн ерөнхий газрын даргаар ажиллаж байсан Д.Түмэндэмбэрэл мялзангийн вацины худалдан авалтыг өөрт ашигтай байдлаар зохион байгуулж үндэслэлгүй хөрөнгөжсөн хэргээр АТГ-т шалгагдан ажлаасаа чөлөөлөгдөөд байгаа юм.