Н.Учрал: Технологийн компаниудыг Буянт-Ухаа руу нүүлгэнэ

Засгийн газрын ээлжит хуралдаанаас гарсан шийдвэрийг холбогдох албан тушаалтнууд танилцууллаа.

Цахим хөгжил харилцаа холбоо/ЦХХХ/-ны сайд Н.Учрал: Цахим хөгжил харилцаа холбооны яам, түүний харьяа байгууллагууд,  технологийн компаниуд, инновац технологийн чиглэлээр үйл ажиллагаа явуулж байгаа компаниудыг Буянт-Ухаа олон улсын нисэх буудал руу шилжүүлэх талаар танилцуулга хийлээ. Тус танилцуулгын хүрээнд Засгийн газрын хуралдаанаар нүүлгэх ажлыг зохион байгуулж, инновацын төв болгон хөгжүүлэх асуудлыг Засгийн газрын Хэрэг эрхлэх газрын дарга үүрэг чиглэл олгосон.

Буянт-Ухаа бол Монголын техникийн соёлын түүчээ болсон олон зуун инженерийн босгосон томоохон бүтээн байгуулалт. 1925 оноос хойш иргэний нисэхийн салбарынхан инженерүүдийн тусламжтайгаар бага оврын агаарын тээврийг өөрсдөө зохион байгуулж, сансарт монгол хүн анх удаа ниссэн гээд иргэний нисэхийн олон ололт амжилтаар Буянт-Ухаа нэрлэгддэг. Тиймээс Буянт-Ухаа олон улсын нисэх буудлын барилга байгууламжийг илүү үр ашигтай ажиллуулах үүднээс болон Засгийн газраас өмнө нь гарсан төрийн захиргааны байгууллагуудыг хотоос нүүлгэн шилжүүлэх, Хөшигийн хөндий рүү шат дараатай шилжүүлэхтэй холбоотой тогтоол батлагдсан. Үүнтэй холбоотой Буянт-Ухаа олон улсын нисэх буудлын тодорхой хэсэгт ЦХХХЯ, түүний харьяа байгууллагууд шилжин байршина гэлээ.