Баян-Өлгий аймгийн Дэлүүн сумын Засаг дарга А.Нурбек хуурамч дипломтой болохыг нь шүүхээр тогтоожээ

Хуурамч дипломтой багш нарыг  БШУЯ-наас зарлаж байгаа энэ үед мөн зарим сумын Засаг дарга хуурамч дипломтой гэдэг нь шүүхээр тогтоогджээ. Тодруулбал, Баян-Өлгий аймгийн Дэлүүн сумын Засаг дарга А.Нурбекийг хуурамч дипломтой гэдгийг Баян-Өлгий аймаг дахь сум дундын Эрүүгийн хэргийн анхан шатны шүүхээс 2022 оны тавдугаар сарын 10-ны өдөр шийтгэх тогтоол үйлдэж, А.Нурбекийг Эрүүгийн хуулийн тусгай ангийн 23.2 дугаар зүйлийн 1 дэх хэсэгт заасан "Хуурамч диплом болохыг мэдсээр байж ашиглах" гэмт хэрэг үйлдсэн гэм буруутайд тооцож шийдвэрлэсэн байдаг.

Шүүхээс ийн шийдвэр гарсан байтал Засаг дарга А.Нурбек өнөөдрийг хүртэл ажлаа хийж, анхан шатны шүүхийн шийдвэрийг үгүйсгэн улмаар Давж заалдах шатны шүүхэд ханджээ. Тэгвэл тус шүүх хурал өнөөдөр  /2022.09.06 /11 цагт товлогдсон байна.

Засаг дарга А.Нурбек нь 1998 онд Бүгд Найрамдах Казахстан Улсын Сейфуллины нэрэмжит Ахмола Хөдөө аж ахуйн дээд сургуулийг Зоо-инженер мэргэжлээр төгсөөгүй атлаа уг сургуулийн 0029942 дугаартай "Зоо-инженер" мэргэжлээр төгссөн гэх дээд боловсролын дипломыг хуурамч болохыг мэдсээр байж, 2020 оны арваннэгдүгээр сарын 09-нд Баян-Өлгий аймгийн Дэлүүн сумын Засаг даргын албан тушаалд томилогдохдоо сумын Засаг даргад тавигдах "дээд боловсролтой" гэх шаардлагад нийцүүлэхийн тулд хуурамч бакалаврын дипломыг ашигласан нь хэрэгт авагдсан нотлох баримтуудаар тогтоогдсон байдаг.  Улмаар түүнд ялын хамгийн бага хэмжээ буюу 800 мянган төгрөгөөр торгож, улсад 25 сая төгрөгийн цалингаа буцаан төлөх шийдвэр гаргасан.

Гэтэл өнөөдрийг хүртэл тэрбээр Монгол Улсын хууль шүүхийг үл хүндэтгэн эрүүгийн гэмт хэрэгт холбогдсон атлаа төрийн ажил хийсээр. Түүнчлэн Баян-Өлгий аймгийн давж заалдах шатны шүүхээр хамгаалуулж үлдэх нь гэсэн хардлага нутгийн иргэдэд байна. Учир нь А.Нурбек нь Баян-Өлгий аймгийн Засаг дарга Д.Бауыржантай ойрын хамаатан учир хуурамч дипломоо хамгаалуулахаар зүтгэж байгаа гэх.

Нөгөөтэйгүүр шүүхийн дээрх шийдвэрийг ханган ажиллах тухай албан бичгийг АТГ-аас Баян-Өлгий аймгийн Засаг дарга Д.Бауыржанд энэ оны зургадугаар сарын 30-нд  хүргүүлсэн байжээ.  Аймгийн Засаг дарга орон нутгийн хэмжээнд аливаа томилгоо, хүний нөөцтэй холбоотой асуудлыг хууль тогтоомжид нийцүүлэн шийдвэрлэж байх, Авлигын эсрэг хууль, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн хэрэгжилтийг авч, зөрчлийг арилган хуулийн хэрэгжилтийг ханган ажиллах үүрэгтэй.

Гэвч тус аймгийн Засаг дарга Д.Бауыржан дээрх холбогдох хууль тогтоомжуудыг үл тоон хуурамч дипломтой А.Нурбекийг хамгаалсаар үлдээх үү гэдэг нь өнөөдрийн шүүх хуралдааны шийдвэрээс шууд хамаарах нь.