Улсын харцага Т.Бэгзсүрэнгийн А сорьцоос допинг илэрчээ

Үндэсний их баяр наадмын хүчит бөхийн барилдаанд барилдсан 64 бөхөөс допингийн шинжилгээ авсан. Шинжилгээгээр “Тавын даваанд унасан, улсын цолтой нэг  бөхөөс допинг илэрсэн” талаар Үндэсний бөхийн салбар хорооны дарга П.Сайнзориг олон нийтэд  өнөөдөр /2022.08.22/ мэдээлсэн. 

Тэгвэл бидэнд олдсон эх сурвалжийн мэдээллээр Завхан аймгийн Отгон сумын харъяат “Даян” дэвжээний бөх, улсын харцага Т.Бэгзсүрэнгийн А сорьцоос допинг илэрчээ. Т.Бэгзсүрэн тавын даваанд шинэхэн начин О.Түмэнтэй  барилдаж, унасан юм.

Бид мэдээллийн тэнцвэртэй байдлыг хангах үүднээс Улсын харцага Т.Бэгзсүрэнтэй холбогдож тодруулах гэсэн боловч тэрбээр утсаа авсангүй. Түүнийг "Хөдөөгүүр яваа" гэсэн мэдээлэл байна.

Түүний хувьд 2011 онд Завхан аймгийн Отгон сумынхаа баяр наадамд түрүүлэн Сумын заан цол хүртэж улмаар 2013 онд Завхан аймгийн баяр наадамд барилдан зургаа давж шөвгөрөн "Аймгийн харцага" цол хүртэж, 2014 онд Завхан аймгийн баяр наадамд сумын заан Б.Чимэдванданд өвдөг шороодон үзүүрлэж "Аймгийн заан" цол хүртсэн. Харин 2016 онд “Аймгийн арслан”, 2018 онд “Улсын харцага” цол хүртэж байв.

Улсын харцага Т.Бэгзсүрэн 1992 онд төрсөн, “Даян дэвжээ”, “Хаан даатгал”, ЗХ-325 дугаар ангийн бөх билээ. 

18 дугаар зүйл.Допингийн эсрэг үйл ажиллагаа

     18.1.Олон улсын допингийн эсрэг агентлагаас жил бүр баталсан допингийн хориглосон жагсаалтад багтсан бодис, аргыг үндэсний бөх, сурын харваач хэрэглэхийг хориглоно.

• 18.2.Бөх, сурын харваач, холбогдох үндэсний спортын холбоо Дэлхийн допингийн эсрэг дүрэм, эсхүл Допингийн эсрэг үндэсний дүрмийг тамирчны нэгэн адил дагаж мөрдөнө.
• 18.3.Энэ хуулийн 14.2-т заасан бөх, сурын харваачаас допингийн шинжилгээ авах арга хэмжээг Монголын үндэсний допингийн эсрэг байгууллага зохион байгуулна.
• 18.4.Бөх болон сурын харваач допингийн төрлийн бодис хэрэглэсэн бол Үндэсний их баяр наадамд барилдах бөх, сурын харваачийн харвах эрхийг энэ хуулийн 18.2-т заасан дүрмийн дагуу хасна.
• 18.5.Энэ хуулийн 14.2-т заасан шинжилгээгээр бөх, сурын харваач допинг хэрэглэсэн нь тогтоогдсон бол тухайн баяр наадамд олгосон цол, чимэг, байрыг хурааж, тухайн даваанд унасан бөх, удаалсан сурын харваачид улсын цолыг нөхөн олгох саналыг зохион байгуулах хороо Монгол Улсын Ерөнхийлөгчид гаргана.
• 18.7.Энэ хуулийн 14.2-т заасан шинжилгээгээр бөх, сурын харваач допинг хэрэглэсэн нь тогтоогдсон бол тухайн бөх, сурын харваачийн Үндэсний их баяр наадамд оролцох эрхийг энэ хуулийн 18.4-т заасан хугацаагаар хасах саналыг салбар хороо зохион байгуулах хороонд гаргаж, шийдвэрлүүлнэ.
• 18.8.Энэ хуулийн 14.2-т заасан шинжилгээгээр бөх, сурын харваач допинг хэрэглэсэн нь тогтоогдсон бол тухайн бөх, сурын харваачийн дасгалжуулагчийн эрхийг хоёр жилийн хугацаанд түдгэлзүүлэх саналыг зохион байгуулах хороо эрх бүхий этгээдэд гарган шийдвэрлүүлнэ.