Л.Энх-Амгалан: Замын төлбөрийг галын хайчаар биш цахимаар авдаг болно

Засгийн газрын өнөөдрийн ээлжит хуралдаанаар хэлэлцсэн асуудлын талаар Цахим хөгжил, харилцаа холбооны сайдын үүрэг гүйцэтгэгч Л.Энх-Амгалан мэдээллээ. Тэрээр "Монгол Улсын Засгийн газар цахим үндэстэн бодлогын хүрээнд цахимжуулалтын ажлыг идэвхжүүлж ажиллаж байна. Улсын хэмжээнд 685 үйлчилгээ цахимжсан байна. Энэ оны төгсгөл гэхэд дахин 600 үйлчилгээг нэмж цахимжуулахаар ажиллаж байна. Ингэвэл төрийн 1200 орчим үйлчилгээ E-Mongolia платформоор дамжиж иргэдэд түргэн, шуурхай хүрэх юм. Өнөөдөр Засгийн газрын хуралдаанаар УУХҮЯ-тай хамтран хэрэгжүүлж байгаа уул уурхайн тусгай зөвшөөрлийн олголтыг ил тод, нээлттэй болгох асуудлуудыг хэлэлцлээ. Өнгөрсөн хугацаанд 13 мянган лиценз олгогдож байсан юм байна. Гэвч энэ лицензийг хэн ямар зорилгоор авч байгаа нь тодорхойгүй байна. Лицензийн наймааны тогтолцоо Монгол улсад байдаг гэдгийг бүгд мэднэ. Уул уурхайн салбар бол манай эдийн засгийн томоохон салбар. Энэ салбарын хамгийн гол асуудал лицензийн наймааг зогсоох. Цаашид лиценз олголтыг авилгагүйгээр, ойлгомжтой, нээлттэй олгох цахимд суурилсан лицензийн тогтолцоог хэрэгжүүлэх ажлуудыг эхэлж байна. УУХҮЯ, Цахим хөгжил, харилцаа холбооны яам хамтарч тусгай зөвшөөрлүүдийг энэ онд багтаан E-Mongolia платформд нэгтгэнэ. Ингэснээр лицензийн наймаанд цэг тавина" гэв.

Мөн ЗТХЯ-тай хамтарч улсын хэмжээнд ажиллаж байгаа замын төлбөр авах цэгийг цахимжуулах шийдвэрийг Засгийн газрын хуралдаанаас гаргалаа. Монгол Улсад олон улсын болон орон нутгийн шинжтэй нийт замын урт 15000 орчим км. Энэ замд төлбөр авах 35 цаг байдаг. Төлбөр авах цэгүүд цахимжаагүй учир орлого нь тодорхойгүй байдаг. Авто зам ашигласны төлбөрийг галын хайч шиг юмаар биш цахимаар авдаг болно. Иргэд замын төлбөрийг QR код уншуулах болон картаар хийх нөхцөл бүрдүүлнэ гэлээ.