Өмгөөлөгчийн байр суурь: Б.Ариунзаяа кофе асгаагүй 20-30 гр-ыг дусаасан, харилцан үл ойлголцол

2022 оны гуравдугаар сарын 1-ний өдөр 15:16 минутад Сүхбаатар дүүргийн 1 дүгээр хороо, Шангри Ла молл төвийн нэг давхрын кофе шопд “Танихгүй хүн манай найзын толгой дээр халуун кофе асгачихлаа” гэсэн дуудлага цагдаагийн байгууллагад бүртгэгдсэн байдаг. Уг асуудал өнөөдөр нийгэмд шүүмжлэл дагуулж байгаа учраас  тухайн хэрэгт холбогдогч Б.Ариунзаяаг сургуулиас хасах шийдвэрийг  МУИС-ийн Хуульзүйн сургуулийн захиргаанаас өнөөдөр /2022.03.03/ гаргасан. 

Бид мэдээллийг тэнцвэртэй хүргэх үүднээс Б.Ариунзаяагийн өмгөөлөгч Л.Баттогтохоос зарим зүйлийг тодрууллаа. 

-Тухайн өдөр яг юу болсон юм бэ?

 -Миний үйлчлүүлэгч Б.Ариунзаяа гуравдугаар сарын 1-ний өдөр кофе шобд  ороод захилгаа өгч байх үед нь гурван залуу, нэг охин буюу дөрвүүлээ Б.Ариунзаяаг шоолж инээсэн, бичлэг хийсэн зэрэг өдөөн хатгасан байдлыг өөрсдөө гаргасан юм билээ. Тэр үед нь  Б.Ариунзаяа очоод "Та хэд намайг таньдаг билүү" гэж хэлэхэд нь үг хэлээрээ гутаан доромжилж сэтгэл зүйн дарамтад оруулсан. Сэтгэлзүйн дарамтад орсон хүн байгалийн инстинкээрээ хариу үйлдэл үзүүлж, барьж байсан кофегоо толгой дээрээс нь дусаасан байсан. Кофе халуун байгаагүй, кофе асгасан гэж яриад байна лээ. Гэтэл асгаагүй, толгой руу 20-30 грамм л дусаасан байна лээ. Олон нийтийн сүлжээгээр хоёрхон минутын бичлэг тархсан, гэвч үүнээс өмнө нь өчнөөн юм болсон. Манай үйлчлүүлэгчээс тийм үйлдэл гаргах хэмжээнд сэтгэл санааг нь стрессдүүлсэн байна шдээ. Өөрөөр хэлбэл дөрвийн эсрэг нэг маргаан болсон. Уг асуудалд нэг талыг хэт барьж байна. Гурван охинтой хамт байсан нэг залуу нь Б.Ариунзаяагийн эрх чөлөөнд хүртэл халдаж, гар нь хөх няц болсон. Цагдаагийн газраас шинжээч эмчийг томилсон. "М" гэдэг охин шүүх эмнэлэгт үзүүлсэн гэсэн. Б.Ариунзаяа мөн шүүх эмнэлэгт үзүүлсэн. Харилцан маргаан болсон юм билээ. 

-Хэдийгээр бухимдуулсан байлаа ч гэсэн таны үйлчлүүлэгч  бусдын толгой дээр кофе асгах нь хэр зохистой үйлдэл юм бэ? 

-Кофе асгаагүй, дусаасан. Харилцан үйлчлэлээс гарсан үйлдэл. Иргэн бүр эрхзүйн этгээд. Эвгүй байдалд орсон байдлаа кофе дусааж байгаа хэлбэрээр илэрхийлсэн гэсэн үг. Дөрвийн эсрэг нэг гэсэн хүчний харьцаа хүртэл яригдана. Амьтан хүртэл өөрийгөө хамгаалах үйлдэл гаргадаг шүү дээ.

-Энэхүү гаргасан үйлдэлдээ таны үйлчлүүлэгч гэмшсэн шинжгүй байна гэж харж болохуйц бүжиглэж буй  бичлэг өчигдөр сошилд цацагдсан. Ер нь үйлчлүүлэгчийнх нь сэтгэлзүй  ямар байгаа вэ? 

-Охины найзуудын групп гэж байдаг юм байна. Найзууд нь Б.Ариунзаяаг "Чи сошилийн од боллоо. Яагаад ийм үйлдэл гаргасан юм бэ, сэтгэл санаа чинь зүгээр үү" гэж асуусан гэсэн. Тэгэхэд нь манай үйлчлүүлэгч "Сэтгэл санаагаар унаагүй" гэсэн илэрхийлэл гаргаж найзуудынхаа группт тухайн бичлэгээ оруулсныг нь олон нийтэд гаргасан байсан. Өнөөдөр нийгэмд нэг зүйл тогтлоо. Тухайн хүнийг хуулийн байгууллагаар гэм буруутай эсэхийг тогтоогоогүй байхад нийт масс нь ялладаг болчихлоо. Эцэг эхийг нь хүртэл цоллож байна. Хүн амины хэрэг хийсэн байлаа ч гэсэн "Үхтэл үр харам" гэж үг бий шүү дээ. Үйлчлүүлэгч маань маш их харамсч байгаа. Амиа хорлох вий гэсэн айдас байна. Сэтгэл санааны дарамтад орж утсаа унтраагаад алга хүртэл болсон. Олон нийтийн сүлжээгээр хэт нэг талыг барьж байна. "Овоо босгоогүй бол шаазгай хаана суух вэ" гэсэн үг хүртэл бий. 

-Таны үйлчлүүлэгч Б.Ариунзаяагийн гаргасан үйлдэл зохисгүй хэмээн үзэж МУИС-иас хасах шийдвэрийг дөнгөж сая гаргасан. Уг шийдвэрт таны байр суурь?

-Энэ шийдвэрийг хүлээн зөвшөөрөхгүй.  Захиргааны хэм хэмжээний актыг зөрчсөн байна гэж үзсэн тохиолдолд заавал урьдчилан шийдвэрлэх асуудал яригдана. Өөрөөр хэлбэл, сонсголын ажиллагаа гэсэн үг. Гэвч энэ процесс явагдалгүйгээр шийдвэр гаргасан нь хууль бус. Бид энэ шийдвэрээр Захиргааны хэргийн шүүхэд хандана.