Б.Энхбаяр: Шүүхийн томилгоотой холбоотой Ерөнхийлөгчийн шийдвэр нь урьд өмнө гараагүй анхны кейс болж байна

ЕТГ-ын мэдэгдэлтэй холбогдуулан УИХ-ын гишүүн Б.Энхбаяртай ярилцлаа. 

Тэрбээр "Ерөнхийлөгч шүүхийн шинэ хуулийн үзэл санаанд үнэнч байгаагаа дахин нотолсон шийдвэр гаргасанд баяртай байна. Шүүх эрх  мэдэл гэдэгт шүүгч (бүх шатны шүүгчид), Шүүхийн ерөнхий зөвлөл, Шүүхийн сахилгын хороо багтдаг.

Ийм бүтцээр 2005-2020 он хүртэл ажиллаж ирсэн. Энэ бүтцийн томилгооны гурвууланд нь  Ерөнхийлөгч оролцож ирсэн. Шүүх эрх мэдэл бүхэлдээ нэг эзэнтэй болсон энэ байдал Х.Баттулга Ерөнхийлөгчийн үед улам төгөлдөршсөн. Ерөнхийлөгчид дээрх эрх мэдлийг ердийн хуулиар олгосон. Гэтэл Үндсэн хуульд “Шүүхийн ерөнхий зөвлөлөөс Улсын дээд шүүхийн нийт шүүгчдийг УИХ-д танилцуулснаар бусад шүүхийн шүүгчдийг Шүүхийн ерөнхий зөвлөлийн санал болгосноор тус тус Ерөнхийлөгч томилно" гэж заасан байдаг. Өөрөөр хэлбэл, Ерөнхийлөгчид Үндсэн хуулиар олгосон хоёр эрх нь бүх шатны шүүгчдийг мөн Улсын дээд шүүхийн ерөнхий шүүгчийг томилох эрхийг л өгсөн. 

Үндсэн хуулийн цэцийн дунд суудлын хуралдааны дүгнэлт гарсны дараа Цэцэд хүсэлт гаргасан тал нь гомдлоо татаж авсан тохиолдол байдаггүй. Энэ утгаараа Ерөнхийлөгч У.Хүрэлсүхийн энэхүү шийдвэр нь хуульд тухайлан тусгаагүй анхны кейс болж байна. Гэхдээ Цэцэд маргаан шийдвэрлэх хуульд зааснаар маргааны хэлэлцүүлгийн аль ч шатанд хүсэлтээсээ татгалзах бүрэн эрхтэй. Энэ утгаараа өмнөх Ерөнхийлөгчийн Цэцэд гаргасан хүсэлтийг одоогийн Ерөнхийлөгч татаж авлаа. Энэ нь юуны урьд улс төрийн шийдвэр. Анхны кейс учраас Цэц Их суудлын хуралдаанаа зарлаж хуралдуулахыг үгүйсгэхгүй" гэлээ. 

Үргэлжлэлийг доорх ВИДЕО-ноос үзнэ үү.