Британи дах ажиллах хүчний хомсдол хэвийн үеийнхээс 14 дахин их болсон

Британийн хөдөлмөрийн зах зээл дээр сая гаруй ажлын байрны санал ирэхтэй зэрэгцээд хоёр сая гаруй ажилгүй иргэд бүртгэгдсэн парадокс байдал үүсээд байгаа тухай “Bloomberg” мэдээлжээ. Ажлын хүчний хомсдол нь хэвийн үеийнхээс 14 дахин өндөр байгаа юм байна. Британийн Засгийн газар ийм олон ажлын байр эздээ хүлээж байгааг цар тахлын дараа эдийн засаг эрчимтэй сэргэхийн шинж гэж үзжээ.

 Одоогийн байдлаар ажиллах хүчний энэ  их хомсдол эдийн засгийн өсөлтийг удаашруулж байгаа юм байна. Ачаа тээвэр, барилга угсралт ба хүнсний үйлдвэрийн салбарт хамгийн их ажиллах хүч шаардлагатай болоод байгаа аж. Улмаар ачааны машины жолооч нар ховор байгаагаас бараан бүтээгдэхүүний нийлүүлэлт удааширч, үүнийг дагаад супермаркетуудын лангуунууд хоосрох болсон байна. Иймд үйлдвэрлэгчид нь Засгийн газарт хандан Европын холбооны жолооч нарт түр виз олгох замаар энэ хомсдолыг арилгах санал гаргасан ч Засгийн газар зөвшөөрөөгүй байна.

Гэхдээ есдүгээр сараас ажиллах хүчний энэ их хомсдол багасна гэсэн тооцоо байгаа аж. Учир нь, есдүгээр сарын 30-нд Ажлын байрыг хадгалах төрийн хөтөлбөр (Coronavirus Job Retention Scheme)-ийн үйлчлэх хугацаа дуусахыг дагаа олон зуун мянган ажилтнууд шинэ ажлын эрэлд гарч эсвэл хуучин ажилдаа буцаж орно. Британийн Үндэсний статистикийн товчооны мэдээгээр наймдугаар сарын эхээр 700 мянгаас 1,2 сая ажилтан “коронавирусийн амралт” аваад байсан. Үүн дээр нэмээд 2019 оны сүүлээр хөл хориод орж хөдөлмөрийн зах зээлийг орхисон ахиад 490 мянган хүн байгаа юм байна.

 Тэгэхээр “Coronavirus Job Retention Scheme” хөтөлбөр дуусахаар 1 гаруй хүн ажлын эрэлд гарах нь гарцаагүй болно. 2020 оны намар эхэлсэн энэ хөтөлбөрийн хүрээнд Британийн Засгийн газар хөл хорионд орсон ажилтнуудын цалингийн 80 хувийг төлж байсан. Энэ оны долоодугаар сараас эхлээд компаниудыг цалингийн 10 хувийг төлөхийг үүрэгдэж төр 70 хувийг дааж байсан. Харин наймдугаар сараас энэ харьцаа 20 ба 60 хувь болж өөрчлөгдөөд байгаа юм. Британийн Засгийн газар энэ хөтөлбөрт 70 тэрбум фунт зарцуулаад 1 сая гаруй англичуудад ажлын байраа алдалгүй хадгалах боломж олгож, ажилгүйдлийг мэргэжилтнүүдийн анхааруулж байсан 10 хувь давуулалгүйгээр ердөө 4,7 хувьд барьж чаджээ.