Гурвалжингийн гүүрний засвар 20 хувьтай байна

Энэ сарын 22-оос 27-ны 10:00 цаг хүртэл хаагаад буй Гурвалжингийн гүүрний зүүн урсгалын засварын ажил 20 хувьтай байна. Баянгол дүүргийн хорьдугаар хороо, Ажилчны гудамжинд байрлах уг хос гүүрний зүүн талын хэсэгт том оврын тээврийн хэрэгслийн хөдөлгөөн их байдгаас шалтгаалан хэв гажилтын заадас эвдэрсэн ба засварын ажлыг хийж гүйцэтгэхийн тулд нэг хойш чиглэсэн урсгалыг хаасан юм. Нийслэлийн зам тээврийн газраас тус гүүрний зүүн талын хэсгийн гурван холбоос эвдэрсэн гэж мэдээлсэн. Зам засварын инженерийн мэдээлснээр засварын ажил одоогоор 20 хувьтай байна. Иргэдийн аюулгүй байдлыг хангахын тулд Гурвалжингийн гүүрний баруун талын урсгалын нэг эгнээг сөрөг урсгал болгон хөдөлгөөнд оруулж байна. Одоогийн байдлаар урдаасаа орж буй хөдөлгөөн Туулын гүүр хүрсэн бол хойноосоо эргэж буй хөдөлгөөн Таван шарын презер хүрч ачаалсан байна. Хөдөлгөөн зохицуулахад нийт 8-9 албан хаагч, албаны гурван алаг тэрэг ажиллаж байна.