Д.Баатарсайхан: Цагдаагийн байгууллагаас ТАЗ дээр яг ямар шалгалт хийсэн талаар надад мэдээлэл алга

-20-40 иргэнийг шалгалт дээр оноо нэмж автоматаар тэнцүүлсэн асуудал яригдаад байна. Бид Төрийн Албаны Зөвлөлийн гишүүн Д.Баатарсайхантай уулзаж тодруулга авсан юм.

-Би ТАЗ-ийн гишүүнээр 2019 оны хоёрдугаар сарын 1-ний өдөр томилогдсон. ТАЗ нь таван гишүүнтэй. Тэгээд ТАЗ-ийн хүлээж авсан үүргүүдийг тав хувааж аваад ажилладаг. Миний хувьд төрийн албаны сонгон шалгаруулалтыг хариуцдаг. Шинэ хуулиар төрийн албаны ерөнхий шалгалтыг хариуцдаг.

-Сүүлд явагдсан шалгалт дээр асуудал гарлаа гэж байна?

-1996 оны долоодугаар сараас эхлээд төрийн албаны шалгалтыг авч байгаа. 20 гаруй жилийн түүхтэй. Гэхдээ төрийн албаны шалгалтыг авах болгонд л янз бүрийн хэл ам гардаг. Тэгээд нотолгоо нь хаана байна вэ? гэхээр нотолгоо нь байдаггүй. Энэ шалгалт өгөөд яадаг вэ? Мэдээж нэг иргэн ажилтай болно. Тэгээд шалгалтад унасан 1000 хүн ингээд янз бүрийн зүйл яриад явдаг болов уу гэж би хувьдаа боддог. Би энэ ажлыг хариуцаж байгаагийн хувьд итгэл дүүрэн байдаг. Хүнээс хамааралгүй нөхцөлд шалгалт авдаг шинэ тогтолцоонд шилжсэн. Ерөнхий шалгалт нь гурван шалгалтаас бүрддэг. Гурвуул босго оноотой, цахимаар авагддаг шалгалт.  Хүн дүн тавих боломжгүй шалгалт. 200 тестээс 3-ыг нь сонгож оруулна. Ингэж оруулах ажлыг нь хүн хийдэггүй. Харин манайхан ойлгохдоо хүн сонгоод оруулдаг юм байна гэж ойлгоод байдаг. Компьютер программын аргаар “random”-оор, санамсаргүй байдлаар сонгодог. Хүний оролцоо байхгүй.

Төрийн албаны шинэ хууль 2019 оны нэгдүгээр сарын 1-ээс үйлчилж эхэлсэн. Үүнээс өмнө төрийн албанд хууль бусаар орох явдал олон байсан. Тэгээд төрийн албанд хууль бусаар орчхоод, тэрийгээ жинхлэх гээд шалгалт өгөөд түүндээ хангалтгүй оноо авчихаар ТАЗ-ийн эсрэг юм болгож харагдуулдаг гэж би харж байгаа. ТАЗ-ийн үйл ажиллагаа ямар байгааг үйлчлүүлэгчид л үнэлнэ. Тэгэхээр хууль хяналтын байгууллагаас шалгаж байгаад сэтгэл өндөр байна. Сайн шалгаад өгөөрэй, бодитой тогтоогоод өгөөрэй. Тэгээд манай ажилтан, албан хаагчид оролцож дүн зассан байдаг юм бол бид тэр хүн дээр хариуцлага тооцъё. Харин тийм юм огт байхгүй бол байхгүй гээд няцаагаад өгөх хэрэгтэй.

Тэгэхгүй шалгалт авах болгонд л Монголын нийгэмд бүх юм болохоо байсан гэж ярьдаг болсон. Бид ажил хийгээд 98 хувийн гүйцэтгэлтэй, 2 хувийн алдаа гаргасан байхад 98 хувийн гүйцэтгэлийг ярьдаггүй. Хоёр хувийн алдааг 98 хувийн алдаа мэт ярьдаг ийм л буруу тогтолцоонд орчхоод байгаа юм.