Д.Нямхүү: Дархлаагаа хамгаалахын тулд 22:00 цагаас өмнө унтаж амрах хэрэгтэй

Шинэ вирусээр халдварласан хүний тоо 31.5 мянга хүрч, 638 хүн нас бараад байна. Уханийн вирустэй холбоотой цаг үеийн мэдээллийг ЭМЯ ээлжит хэвлэлийн бага хурлаараа хийлээ.

ДЭМБ-ын ажилтан О.Ариунтуяа:

-Өнөөдрийн 8 цагийн байдлаар 31436 тохиолдолд 638 нас баралт, 3174 тохиолдол бүртгэгдсэн. Халдварын 70 хувь нь Уханьд ногдож байна. ДЭМБ-аас бэлэн байдлын стратегийн хөтөлбөр хэрэгжүүлж эхэлсэн. 2-р сарын 11-12 өдрүүдэд ОУ-ын форум зохион байгуулна.

Нийслэлийн эрүүл мэндийн газар Энхзаяа

-Нийслэлийн харьяа эмнэлгүүдэд 806 хүүхэд хэвтэн эмчлүүлж байна. Орны ачаалал багассан. Коронавирусийн халдвартай холбоотойгоор хүмүүсийн төвлөрлийг үүсгэхгүй байхад онцгой анхаарч байна. Нийслэлийг тойрсон 8 пост дээр эрүүл мэндийн байгууллагууд 24 цагаар тандалт шалгалт хийхээр болж байна.

Мал эмнэлгийн хүрээлэн Батсайхан:

-2020 оны хоёрдугаар сарын 5-нд Ухан мужтай залгаа Хунань мужид 7850 тахиатай газар илэрч 4000 нь үхсэн. Шувууны томууны эсрэг эм байхгүй тул 17 мянган тахиа устгаад байна. Иймд манайх өвчний голомттой газраа тахиа, гахайны мах оруулахыг бүрэн хориглосон. Одоогоор шувууны томуунаас улбаалсан ямар нэг хохирол МУ-д илрээгүй байна.

ХӨСҮТ-ийн захирал Д.Нямхүү

-Манайд ирсэн бүх шинжилгээ сөрөг гарсан. ХӨСҮТ-д зургаан хүн хянагдаж байна. Ховд ба Дархан Уул аймагт тусгаарлагдсан хүмүүсийн шинжилгээний сорьц ирсэн. Урьдчилан сэргийлэх арга хэмжээг үргэлжлүүлэн авсаар байх хэрэгтэй. Эмнэлгээр үйлчлүүлж байгаа хүний тоо цөөрч байна. Хөнгөн хэлбэрийн томуу томуу төстийг гэртээ дарж авах хэрэгтэй. Хүүхдээ дагуулж эмнэлгээр явбал янз бүрийн халдвар авах эрсдэлтэй.

Хүн болгонд байдаг хамгаалах хэрэгсэл нь дархлаа юм. Сайн унтаж амрах нь дархлааг сэргээдэг. Хуурамч мэдээлэл, стресс хамгийн аюултай. Дэмий таагаад явах биш эмнэлгээр үзүүлээд оношлуулж явах хэрэгтэй. Иймд санаа сэтгэлээ тайван байлгах, дэмий стресст автахгүй байх хэрэгтэй.