АГААРЫН БОХИРДОЛ АЮУЛЫН ХАРАНГА ДАГУУЛСААР...

Монгол Улсын хүн амын тал нь оршин суудаг Улаанбаатар хот дэлхийн хамгийн их агаарын бохирдолтой нийслэл хотуудын нэг болжээ. 2018 оны нэгдүгээр сарын 30-ны 05.00 цагт Улаанбаатар хотын Баруун 4 зам орчимд нарийн ширхэглэгт тоосонцор буюу РМ 2.5 –н хэмжээ 3320 мкг/м3 хүрсэн нь ДЭМБ-ын зөвшөөрөгдсөн агаараас 133 дахин их байгаа үзүүлэлт аж. Улаанбаатар хотын агаарын бохирдол өндөртэй төв дүүрэгт оршин суудаг хүүхдүүдийн уушгины багтаамж хөдөө орон нутагт амьдардаг хүүхдүүдийнхээс 40 хувиар бага байгааг судлаачид тогтоожээ. Хүүхдүүд томуу, уушгины үрэвсэл, гуурсан хоолойн үрэвсэл, гуурсан хоолойн багтраа өвчин, амьсгалын доод замын бусад халдвараар ихэвчлэн өвдөж байна. 2015 оны байдлаар Монгол Улсын нийт хүн амын 45.7 хувь нь Улаанбаатар хотод оршин сууж байгаа ба хотжилт төлөвлөгдөөгүй байдлаар явагдсан тул захын гэр хороолол огцом тэлсэн. Ингэснээр нийт хүн амын 60 гаруй хувь нь оршин сууж, эрүүл мэнд, орчны хүнд нөхцөлд амьдарч байна. Нөгөө талаар уур амьсгалын өөрчлөлт, газар, хөрсний доройтлоос улбаалан хөдөөгийн амьжиргаа муудаж, цаашид хөдөөгөөс хот руу шилжих хөдөлгөөн нэмэгдэхэд нөлөөлөх магадлал өндөр байгаа юм. Агаарын бохирдол хүүхдийн эрүүл мэндэд эхийн хэвлийд бий болсон цагаас нь эхлэн сөргөөр нөлөөлдөг. Монголд ургийн эндэгдэл өвөл, зуны улирлын хоорондох ялгаа 3.5 дахин зөрүүтэй байна. Сүүлийн 10 жилийн хугацаанд 10 мянган хүнд ногдох амьсгалын замын өвчлөл огцом нэмэгдэж, уушгины үрэвсэл 5 хүртэлх насны хүүхдийн эндэгдлийн 2 дахь шалтгаан болж байна. 2015 онд 5 хүртэлх насны 435 хүүхэд уушгины үрэвслийн улмаас нас барсан байна. 2016 онд 0-18 насны хүүхдийн агаарын бохирдлын холбоотой өвчлөл Улаанбаатар хотын эрүүл мэндийн байгууллагуудад 10.4 тэрбум төгрөг буюу4.8 сая ам.долларын зардал гарсан аж. Хүүхдүүд томуу, уушгины үрэвсэл, гуурсан хоолойн үрэвсэл, гуурсан хоолойн багтраа өвчин, амьсгалын доод замын бусад халдвараар өвдсөн байна.