ЭРҮҮЛ МЭНДИЙН ЧИГЛЭЛЭЭР ҮЙЛ АЖИЛЛАГАА ЭРХЛЭХ ТУСГАЙ ЗӨВШӨӨРӨЛ ОЛГОХ ЭСЭХ АСУУДЛААР ХЭЛЭЛЦЛЭЭ

Нийгмийн хөгжлийн асуудал хариуцсан төслүүдийн удирдагч нар өнөөдөр Нийслэлийн Засаг даргын орлогч Ш.Анхмаагаар ахлуулсан ажлын хэсэг хуралдлаа. Эрүүл мэндийн чиглэлээр үйл ажиллагаа эрхлэх тусгай зөвшөөрөл олгох, хүчингүй болгох, сэргээх талаар хэлэлцсэн. Мөн цаашид тусгай зөвшөөрөл олгохдоо тавигдах шаардлагыг өндөрсгөх, байршлыг оновтой болгох талаар санал солилцсон юм.

Нийслэлийн Засаг даргын 2017 оны А/193 дугаар захирамжаар байгуулагдсан ажлын хэсгийн бүрэлдэхүүнд Нийслэлийн Эрүүл мэндийн газар, Нийслэлийн Мэргэжлийн хяналтын газар, Нийслэлийн Засаг даргын тамгын газар, Нийслэлийн Хэрэглэгчдийн эрх ашгийг хамгаалах нийгэмлэгийн төлөөлөл багтдаг. Харин ажлын хэсгээс эрүүл мэндийн чиглэлээр үйл ажиллагаа эрхлэх тусгай зөвшөөрөл хүссэн хуулийн этгээдийн хүсэлтийг хэлэлцэж эмнэлэг, сувилал, эмийн сан эрлэх байгууллагад тусгай зөвшөөрөл олгодог. Мөн ахуйн хортон шавж, мэрэгч устгал, ариутгалын үйлчилгээ эрхлэх тусгай зөвшөөрөл олгодог билээ.