ХӨВСГӨЛ НУУР ОРЧМЫН БОХИРДЛЫГ БУУРУУЛАХ АЖЛЫН ХЭСЭГ БАЙГУУЛЛАА

Амралтын улирал эхэлсэнтэй холбогдуулан Хөвсгөл нутгийг зорих жуулчдын тоо эрс нэмэгддэг билээ. Харин Хөвсгөл нуурын ойролцоох орчин хог хаягдлаар дүүрч гамшгийн хэмжээнд хүрэх эрсдэл ойрхон байгаа. Тиймээс аймгийн Засаг дарга Л.Ганболд Засаг даргын зөвлөлийн хуралдаанаар Хөвсгөл нуур орчмын бохирдлыг бууруулах ажлын хэсгийг байгуулж шаардлагатай арга хэмжээг шуурхай авч ажиллах үүрэг өгсөн.

Харин Хөвсгөл нуур орчмын бохирдлыг бууруулах ажлын хэсгийн ахлагчаар Газрын харилцаа, барилга хот байгуулалтын газрын дарга Н.Бямбадоржийг томилжээ. Ажлын хэсэг нуурын орчмын газраар хууль хяналтын байгууллагын төлөөлөл бүхий холбогдох байгууллагынхантай хамтран өнөөдрөөс хяналт шалгалт хийж 5 хоног ажиллахаар боллоо.

Тэгвэл Баяр наадмын өдрүүдэд Хөвсгөл нуурт өдөрт 10 мянга гаруй иргэд ирж байсан бол өнөөдийн байдлаар өдөрт 6000 орчим иргэд байнга ирж, явж байгаа ажээ. Жуулчны бааз, дэн буудлууд хүн дүүрсний улмаас иргэд Хөвсгөл нуурын эрэг дагуу, зарим иргэн тусгай хамгаалалттай газруудад дураараа бууж амарч, зугаалж байгаа төдийгүй явахдаа хог хаягдлаа орхин орчноо бохирдуулсаар байгаа юм.

Ю.Нямгэрэл