15 ЦАГААС БАТСҮМБЭРЛҮҮ ХӨДӨЛНӨ

Өнөөдрийн байдлаар улсын хэмжээнд нийт арван түймэр асч байна. Тодруулбал, Сэлэнгэ аймгийн Ерөө, Мандал сумдад тус бүр гурван түймэр, Хүдэр суманд хоёр түймэр, Төв аймгийн Батсүмбэр суманд таван түймэр, нийтдээ 13 түймэр гарснаас гурван түймрийг цурманд оруулжээ.

Эдгээр түймрийг унтраахаар Онцгой байдлын ерөнхий газрын харьяа Аврах тусгай анги, Нийслэлийн Онцгой байдлын газар, орон нутгийн Онцгой байдлын газруудаас нийт 207 алба хаагч, орон нутгаас 140 иргэн, 29 автомашин, техник хэрэгсэлтэйгээр ажиллаж байгаа юм.

Төв аймгийн Батсүмбэр сумын нутагт гарсан түймэр суурин газарт ойртож байгаа тул нийслэлийн иргэд тусламжийн аян эхлүүлээд байна. Аянд нэгдсэн иргэд хоол хийх, ус зөөх, түймэр унтраах, эмнэлгийн тусламж үзүүлэх зэргээр ажлаа хуваарилжээ. Тэдний зарим нь өнөөдөр /2017.07.14/ өглөө түймрийн голомт руу хөдөлсөн байна. Харин зарим хэсэг нь үдээс хойш 15.00 цагт Сүхбаатарын талбайгаас хөдлөх аж.

Гэхдээ энгийн иргэд түймэр унтраах туршлагагүй тул аюул эрсдэлд орж болзошгүйг албаныхан анхааруулж байна. Түймрийн голомт руу явах гэж байгаа иргэдэд нэн тэргүүнд түрийтэй гутал, даавуун материалтай зузаан хувцас, өвчин намдаах эм зэрэг байх шаардлагатай аж.