ЗАЛУУ 250 ХАРВААЧ ЦЭЦ МЭРГЭНЭЭ СОРЬЖ БАЙНА

Тулгар төрийн 2226 жил, Их Монгол Улсын 811 жил, Ардын хувьсгалын 96 жилийн ойн их баяр наадмын Үндэсний сурын харваа өчигдрөөс эхэлсэн. Энэ жил эрэгтэй, эмэгтэй нийт 540 харваач оролцохоор бүртгүүлжээ. Тухайлбал Монгол улсын дархан мэргэн 4, даяар дуурсах мэргэн 2, даян мэргэн 4, улсын мэргэн 17, хүндэт мэргэн 6, гарамгай харваач 7, гоц харваач 15 багтжээ. Түүнчлэн спортын мастер, аймгийн мэргэн 77, спортын мастер 68, спортын дэд мастер 55, I зэргийн харваач 28, II зэргийн харваач 5, III зэргийн харваач 2 байгаа аж. Харин 206 залуу цэц мэргэнээ сорьж байна. Тэгвэл харваачид нийт 40 сум тавина. Эрэгтэй 75 метр, эмэгтэйчүүд 65 метрээс харвах бөгөөд хана харваанд 20, хасаа харваанд 20 сумыг тавих юм. Өчигдөр хана харвааны эхэн өрөг болгосон. Өнөөдөр хасаа харвааны эхэн өрөг явагдаж, шилдэг харваачид цааш өрсөлдөнө. Наадмын сүүлийн өдөр буюу долдугаар сарын 12-ны өдрийн 13.40-14.00 цагийн хооронд үндэсний сурын түрүү тодруулах шилдэг найман харваачийн харваа болно.