ЖАРГАЛСАЙХАНЫ УЯСАХЫН БОР ҮРЭЭ ХОЁР ЖИЛ ДАРААЛАН ТҮРҮҮ МАГНАЙД ХУРДАЛЛАА

Тулгар төрийн 2226 жил, Их Монгол улс байгуулагдсаны 811 жил, Ардын хувьсгалын 96 жилийн ой үндэсний их баяр наадмын хурдан морьдын уралдаан өнөөдөр хязаалан насны морьдын уралдаанаар эхлэсэн. 16 км замд газар газрын 153 хурдан хүлэг тоосоо өргөлөө. Үүнээс Архангай аймгийн Ихтамир сумын уяач Ж.Уясахын бор үрээ түрүү магнайд хурдлаа. Харин аман хүзүүнд Өмнөговь аймгийн Цогтцэций сумын харьяат, Монгол Улсын тод манлай уяач Д.Бат-Эрдэнийн цавьдар, айргийн гуравт Баянхонгор аймгийн Богд сумын уяач Д.Ганбатын хонгор халзан хурдалсан. Айргийн дөрөвт Дорнод аймгийн Цагаан-Уул сумын харьяат Т.Батсайханы шарга, айргийн тавд Баянхонгор аймгийн Богд сумын уяач Д.Ганбаатарын хонгор үрээ орж ирж наадамчин олноо баярлууллаа.