ХЭҮК: Жилд дунджаар 300 хүн агаарын бохирдлын улмаас нас барж байна

Монгол Улсын Хүний эрхийн Үндэсний Комиссоос хийсэн мэдээлэлд агаар, орчны бохирдлоос үүдэлтэй хүний эрхийн зөрчлийн асуудлаар онцолсон.

Мэдээлэлд, агаарын бохирдол нь Монгол Улсад хавсарсан байдлаар нас баралт, хөгжлийн бэрхшээлд хүргэх эрсдэлийн 10 гол хүчин зүйлийн нэг болж байна.

Агаарын бохирдлын нөлөөнд 65-аас дээш насны өндөр настан, 0-5 насны хүүхэд, жирэмсэн эх, архаг, суурь өвчтэй хүмүүс илүү өртөж байна.

Монгол Улсад жилд дунджаар 300 хүн агаарын бохирдлоос үүдэлтэй өвчний улмаас нас барж байгаа бөгөөд үүний 240 нь 0-5 хүртэлх насны хүүхэд байгаа бөгөөд 0-5 хүртэлх насны хүүхдүүдийн эндэгдлийн хоёр дахь шалтгаанд уушгины хатгалгаа орж байна.

Түүнчлэн сайжруулсан шахмал түлш хэрэглээнээс шалтгаалж угаарын хийд хордох, угаартаж нас барах тохиолдол жил бүр өссөөр байна.

Нийгмийн эрүүл мэндийн үндэсний төвд сүүлийн 7 жилийн хугацаанд бүртгэгдсэн угаарын цочмог хордлого нь 9009 тохиолдол бүртгэгдсэн.Тандалтын мэдээллээр 2017-2023 оны байдлаар 103 нас баралтын тохиолдол бүртгэгдсэн байна.

Шахмал түлшийг хэрэглээнд нэвтрүүлснээр агаарт хаягдах тоос, тоосонцрын агууламжийг бууруулах тал дээр тодорхой хэмжээгээр ахиц гарсан хэдий ч түлшний түүхий эдийн чанарыг сайжруулах шаардлагатай байна.

Мөн угаарын бохирдлоос иргэд өөрсдийн болон үр хүүхэд, гэр бүлийнхний амь насыг хамгаалах, шахмал түлшийг стандартын дагуу хэрэглэх, аюулгүй байдлыг хангах, шахмал түлшний хэрэглээний талаарх мэдээ, мэдээллийг олон нийтэд хүргэх, сэрэмжлүүлэх, орон суужцуулах, дэд бүтцийг шийдвэрлэх ажлыг холбогдох албаныхан шат дараатай арга хэмжээг үр дүнтэй авч хэрэгжүүлэхийг зөвлөв.