​ТӨРИЙН ДАЛБААНЫ УТГА АГУУЛГЫГ ТАНИУЛАХ СУРГАЛТ БОЛЛОО

Төрийн далбаа нь улс үндэстнийхээ хувьд асар чухал ач холбогдолтой, гүн гүнзгий утга санааг илэрхийлэхээс гадна тухайн орныхоо түүх соёлыг агуулж, олон улсад нүүр царай нь болж байдаг. Тиймээс төрийн далбааны ач холбогдол, гүн гүнзгий утга агуулга, бэлгэдлийг ойлгож, дээдлэн хүндэтгэж байх ёстой. Гэвч сүүлийн жилүүдэд төрийн далбааны бэлгэдэл, хүндэтгэл улам бүр үгүй болж, гадны улс орон, улс орондоо иргэд нь төрийн далбаагаа гутаан доромжилсон байдал газар аваад байгаа юм. Тиймээс "Иргэдийн Шударга Шүүх" ТББ "Арин төр, ариун далбаа" төслийг эхлүүлээд байгаа бөгөөд "Нийслэлийн засаг даргын тамгын газар" уг төслийг дэмжин ажиллаж байгаа аж. Ийнхүү хамтран ажиллах гэрээний дагуу ажлын хэсэг гарган бүх хороо, дүүрэгт төрийн далбааны үзлэг хийх, тэнд ажиллаж байгаа төрийн албан хаагчид төрийн далбааны бэлгэдэл, ач холбогдол, төрийн бэлгэ тэмдгийн тухай хуулийг мэдэж байгаа эсэхэд судалгаа, сургалт зохион байгуулж байгаа аж.

Төслийн ажлын албаныхны мэдээллэж буйгаар бол судалгаанд хамрагдсан хороо дүүргийн албан хаагчид төрийн далбааны болон төрийн бэлгэ тэмдгийн тухай хуулийн мэдлэг дулимаг байгааг онцолж байсан юм.

"Ариун төр, ариун далбаа" төслийн ажлын хэсэг өчигдөр Налайх дүүргийн Засаг даргын тамгын газартай хамтран тус газарт ажиллаж байгаа албан хаагчид болон хорооны засаг дарга, нийгмийн ажилтан, хэсгийн ахлагч нарт богино хэмжээний сургалт зохион байгуулж, судалгаа авчээ.

Энэ үеэр Налайх дүүргийн засаг даргын тамгын газрын дарга "хүн хэлэхээс нааш, цаас чичихээс нааш" гэж үг бий. Бидэнд Төрийн далбааны бэлгэдэл, ач холбогдол, төрийн бэлгэ тэмдгийн тухай хуулийн хэрэгжилтийн талаар сануулсанд талархаж, цаашдынх нь ажилд амжилт хүсье" гэлээ.