ЭЭЛЖИЙН АМРАЛТАА АВААД ЯВЖ БАЙСАН ГЭМТЛИЙН ТАВАН ЭМЧ ОСОЛДСОН БАЙНА

ГССҮТ-ын таван эмч осолд орсон нь сайдын буруутай үйл ажиллагаанаас болсон гэх мэдээлэл сошиал ертөнцөд түгээд байсан билээ. Тэгвэл энэ мэдээлэл нь ор үндэсгүй, худал мэдээлэл болохыг ГССҮТ-ийн захирал Т.Мөнхсайхан хэвлэлийн хурлын үеэр хэлсэн юм. Тэрбээр "Манай эмнэлгийн таван эмч осолд өртөж, бидэнд хүнд байдал тохиолдоод байна. Эмч нарын маань хувьд амралтын шугамаар Өвөрхангай аймгийг зорьж, Эрдэнэзуу хийдэд мөргөөд, буцаж явах замдаа осолдсон байна. Олон нийтэд мэдээлж байгаачлан Эрүүл мэндийн сайдын тушаалаар намын сурталчилгаа зэрэг ажилд оролцож байсан гэх мэдээлэл ор үндэсгүй. Манай эмч нар энэ жилийн хувьд 'Элэг бүтэн Монгол' хөтөлбөрийн хүрээнд л орон нутагт ажилласан. Өөр хөдөөд албан ёсоор ажилласан тохиолдол байхгүй. Энэ удаагийн осол болсон тохиолдол уг хөтөлбөртэй хамаагүй. Эмч нар маань чөлөөт цагаараа явж байгаад харамсалтай осол боллоо. Ийм хүнд хэцүү үед олон нийтэд ташаа мэдээлэл хүргэхгүй байхыг иргэд, хэвлэл мэдээллийн байгууллагуудаас хүсч байна" гэлээ.

Тус эмнэлгийн эмч нар УБН 89 79 улсын дугаартай 'Приус' машинтай Элсэн тасархайгаас10 гаруй км-ийн зайд зорчиж яваад зорчигч тээврийн автобустай мөргөлдөн, осолдож, таван эмч хүнд гэмтэл авсан байна. Осол өчигдөр14:00 цагийн үед гарчээ. Тэд Өвөрхангай аймгаас Улаанбаатар руу зорчиж явсан байна.

Одоогийн байдлаар эмч нарын хоёрынх нь бие маш хүнд байгаа аж. Осолдсон машин хоёр эрэгтэй, гурван эмэгтэй эмч байжээ. Осолд өртсөн таван эмч тавуулаа сэхээнд байгаа бөгөөд нэгэнд нь яаралтай мэс засал хийсэн байна.