​УРЬДЧИЛГААГҮЙ ИПОТЕКИЙН ЗЭЭЛД ХАМРАГДАХ ХҮСЭЛТЭЙ ИРГЭДИЙН ӨРГӨДЛИЙГ ХҮЛЭЭН АВААД ЭХЭЛЖЭЭ

Нийслэлийн агаарын чанарыг сайжруулах 1, 2 дугаар бүсийн оршин суугчид орон сууцны ипотекийн зээлд урьдчилгаа төлбөргүйгээр хамрагдах боломж бүрдсэн талаар бид мэдээллэсэн билээ. Улаанбаатар хотын захирагч С.Батболд Улаанбаатар хотын хамгийн өндөр агаарын бохирдолтой хэсэг буюу 1, 2 дугаар бүсийн нутаг дэвсгэрт байрлах 182.616 өрх ипотекийн зээлд хамрагдахдаа урьдчилгаа төлбөрөө нийслэлийн агаарын бохирдлыг бууруулах "Орон сууцны сан"-гийн дэмжлэгээр бүрэн төлүүлэх боломж бүрдээд байгаа талаар мэдээллэсэн юм.

Тэгвэл Нийслэлийн Засаг даргын санаачилсан энэхүү сангийн журам батлагдан, хамрагдах хүсэлтэй иргэдийн өргөдлийг Нийслэлийн Гэр хорооллын дэд бүтцийн газар 2017 оны зургаадугаар сарын 30-ны өдрөөс авч эхэллээ. Тиймээс Агаарын чанарыг сайжруулах 1, 2-р бүсийн оршин суугчид Нийслэлийн Гэр хорооллын дэд бүтцийн газарт очиж өргөдлөө өгөх боломжтой болсон байна.