​18 МЯНГАН ХҮН ЦАГААН ХУУДСААР САНАЛАА ӨГЧЭЭ

Монгол Улсын тав дахь Ерөнхийлөгчийг тодруулах санал хураалт өчигдөр улс даяар 07:00 цагт эхэлж, 22:00 цагт дуусгавар болсон. Сонгуулийн ерөнхий хороо хэсгийн хороодын мэдээллийг дэлгэцээр олон нийтэд шууд хүргэсэн билээ.

Санал хураалтанд АН-аас нэр дэвшигч Х.Баттулга тэргүүлж 516784, МАН-аас нэр дэвшигч М.Энхболд 410622, МАХН-аас нэр дэвшигч С.Ганбаатар 409718 санал тус, тус авсан нь нэр дэвшигчдийн сонгогчдоос авсан санал 50 хувийн босго давж чадсангүй.

Тэгэхээр Монгол Улсын Ерөнхийлөгчийг сонгох сонгууль дахих нь тодорхой болоод байна. Сонгуулийн тухай хуулийн 105.1-т "Ерөнхийлөгчийн сонгуульд нэр дэвшигчдийн хэн нь ч анхан шатны сонгуулийн нэгдсэн дүнгээр олонхийн санал аваагүй бол хамгийн олон санал авсан хоёр хүнийг хоёр дахь санал хураалтад оруулна",

Сонгуулийн тухай хуулийн 105.2-т "Сонгуулийн төв байгууллага хоёр дахь санал хураалтыг анхны санал авсан өдрөөс хойш 14 хоногийн дотор зарлан, зохион байгуулна" гэж заажээ.

Иймээс хуулийн дээрх заалтыг үндэслэн Сонгуулийн ерөнхий хороо дахин санал хураалтын тов зарлах болж байна.

Энэ удаагийн сонгуульд 1.9 сая сонгогч нэрсийн жагсаалтад бүртгэгдсэн байснаас 1.3 сая сонгогч саналаа өгсөн нь 66.54 хувийг хамарч буй. Анхаарал татсан асуудал нь сонгогчдоос 18 мянга нь цагаан хуудсаар саналаа өгчээ.

Намуудыг нэр дэвшигчдээ тодруулж, олон нийтэд зарлах мөчид сонголтгүй сонгууль болж буй тухай сошиал ертөнцөөр нэлээд шүүмжлэл дагуулсан. Тиймээс 18 мянган хүн энэ байдлаа илэрхийлсэн ч байж болох юм.