ЭМЯ: Тарваган тахлын хүний өвчлөл гарч, нийгмийн эрүүл мэндийн ноцтой байдал үүсэх өндөр эрсдэл байна

Эрүүл мэндийн яамнаас тарваган тахал өвчлөлийн нөхцөл байдал болон урьдчилан сэргийлэх талаар мэдээлэл өглөө. 

ЭМЯ-ны Нийтийн эрүүл мэндийн газрын дарга Д.Баярбат

Тэрбээр “ЗӨСҮТ-өөс гаргасан тарваган тахлын байгалийн голомтын аюулын зэрэглэлээр 15 аймгийн 78 суманд хүний өвчлөл гарах эрсдэл өндөр байна гэж дүгнэсэн.Тарваган тахлын байгалийн голомтын идэвхтэй тандалтыг ЗӨСҮТ,аймаг,  нийслэлийн ЗӨСҮТ  байнга хийдэг. 2012-2021 онд нийт зургаан аймгийн 21 суманд тарваган тахлын идэвхжил өндөр,голомт байгааг тогтоосон. Мөн дээрх хугацаанд Ховдод долоо, Өвөрхангай Сант суманд нэг, Баян-Өлгий аймгийн Ногоон нуур суманд хоёр, Завхан аймагт хоёр, Говь-Алтай аймгийн Төгрөг суманд нэг, Хөвсгөл аймгийн Мөрөн, Жаргалан суманд хоёр буюу нийт зургаан аймгийн 11 cуманд 15 хүн тарваган тахлаар өвчилж, долоон хүн нас барж байсан судалгаа бий.

Манай улсын  дотоодын аялал жуулчлалын төв зам тарваган тахлын нутагшмал голомттой бүс нутгаар дайран өнгөрдөг нь тухайн нутгийн оршин суугчдаас гадаад, дотоодын жуулчид халдварт өртөх эрсдэл өндөр байна гэж үздэг.Мөн иргэд тарвагыг хууль бусаар агнах, худалдаалан, хот суурин газар руу тээвэрлэх, хүнсэнд хэрэглэх явдал тасралтгүй гарсаар байгаа нь эрсдэл дагуулдаг.Энэ он гарсаар Баян-Өлгий аймгийн Улаанхус , Бугат, Ногооннуур, Цэнгэл, Сагсай мөн Увс аймгийн Сагил, Ховд аймгийн Үенч  сумын нутгаас олдворлосон мэрэгч амьтдаас тарваган тахлын үүсгэгч нянг илрүүлсэн.

Тарваган тахлын хүний өвчлөл гарч, нийгмийн эрүүл мэндийн ноцтой байдал үүсэх өндөр эрсдэл байгааг тогтоосон.

 Эрүүл мэндийн сайд тарваган тахлын хяналт сэргийлэлтийн арга хэмжээг эрчимжүүлэх талаар долоон чиглэлийг  аймаг нийслэлийн засаг дарга, аймгийн эрүүл мэндийн газар, зоонозын өвчин судлалын төвүүдэд хандсан албан даалгавар гаргаж, хүргүүлсэн. Тухайлбал, аймаг, нийслэлийн Засаг дарга нар тарваган тахал болон бусад Зоонозын халдварт өвчний дэгдэлтийн хариу арга хэмжээний бэлэн байдлыг хангаж ажиллах ёстой. Мөн сэжигтэй тохиолдол бүртгэгдвэл ажиллах салбар хоорондын багийг ажиллуулах шаардлагатай. Энэ өвчлөлийн үед ЭМ-ийн байгууллагуудаас гадна бусад салбарын ч оролцоо чухал.  ЭМ-ийн байгууллагууд урьдилан сэргийлэх болон сэжигтэй тохиолдол гарвал тусгаарлан эмчлэх, бэлэн байдлаа хангасан байх шаардлагатай" гэлээ.