Сахарын цөлд сүүлийн 50 жилд анх удаа бороо оржээ

Уур амьсгалын өөрчлөлт гэдэг нь зөвхөн агаарын температур нэмэгдэх бус байгалийн тэнцвэрт байдал алдагдахыг хэлдэг. Сүүлийн жилүүдэд дэлхий дахинаа уур амьсгалын өөрчлөлт хурдацтайгаар явагдаж байна. Дэлхийн цаг уурын нөхцөл байдлын талаар НҮБ-ын ерөнхий нарийн бичгийн дарга Антонио Гутерреш нэгэнтээ “хүн төрөлхтөн уур амьсгалын там руу хурдны замаар давхиж явна” хэмээн хэлсэн байдаг. Үүнийг баталсан шиг дэлхийн өнцөг булан бүрд цаг агаарын ховор үзэгдэл өнгөрсөн хэдхэн хоногт тохиолоо.
Япон улсын аялал жуулчлалын төв болсон алдарт Фүжи ууланд өнөөдрийг хүртэл цас унаагүй байна. Нийслэл Токио хотоос баруун урд зүгт 100 орчим км-т байдаг идэвхтэй галт уул Фүжи жирийн үед жил бүрийн аравдугаар саран эхэн гэхэд цагаан цасанд хучигдсан байдаг ажээ. Эрдэмтэн судлаачид 130 жилийн өмнөөс Фүжи уулан дах хур тунадасны хэмжээг судалж тогтоож ирсэн байна. Гэвч энэ цаг үеэс хойш анх удаа тус ууланд цас уналгүй хамгийн удаж байгаа тохиолдол болж байгаа аж.

Марокко Улсын зүүн-өмнөд бүсэд орших Сахарын элсэн цөлд бороо оржээ. Сахарын цөл бол дэлхийн хамгийн хуурай, үржил шимгүй газруудын нэг. Түүнчлэн энэ газарт жилд хэдхэн инч бороо ордог бөгөөд энэ удаа 48 цагийн турш үргэлжлэн оржээ. Энэ нь Сахарын цөлд сүүлийн 40-80 жилийн ган гачгийн дараа орсон бороо буюу 200 мм-ээс давсан хур тунадас орж байгаа тун ховор тохиолдол юм.

АНУ-ын Хавайн аралд агаарын даралт огцом буурч, уулархаг нутгаар их хэмжээний цас орсон гэж мэдээллээ. Хавайн арлуудын цаг агаар маш тогтвортой бөгөөд жилийн туршид температур бага зэрэг хэлбэлздэг. Зуны улиралд өдрийн дундаж температур 29.4 ° C, өвлийн дундаж температур 25.6 ° C байдаг. Тус аралд их хэмжээний цас орсон нь цаг агаарын ховор үзэгдэл болсон байна.

Эх сурвалж: СNBC Mongolia