АМИА АЛДСАН ЦАГДААГИЙН АЛБА ХААГЧИЙН ТАЛААР МЭДЭЭЛЛЭХГҮЙ БАЙХЫГ ХҮСЭВ

Зэвсэгт хүчний Ерөнхий командлагчийн нэрэмжит "Марш тактик-2017" цогцолбор тэмцээнд оролцож байсан цагдаагийн албан хаагч амь насаа алдсан, албан хаагчдыг удирдаж тэмцээнд оролцсон хурандаа амиа алдсан гэх харамсалтай мэдээлэл гарсан. Энэ асуудлаар ЦЕГ-ын Хэвлэл мэдээллийн төвийн ажилтан, хошууч Ё.Лхагвасүрэн дараах тайлбарыг хийсэн юм. Тэрбээр

"Зэвсэгт хүчний Ерөнхий командлагчийн нэрэмжилт "Марш тактик-2017" цогцолбор тэмцээнд Үндэсний аюулгүй байдлын чиг үүрэг бүхий есөн байгууллагын 19 баг буюу нийт 500 орчим баг тамирчид өрсөлдсөн. Харин цагдаагийн байгууллагаас нэг эрэгтэй, нэг эмэгтэй салаа оролцсон байдаг. Харамсалтай нь тэмцээнд оролцсон нэг албан хаагч амь насаа алдсан хэрэг гарсан. Үүний дагуу холбогдох ажиллагаа хийгдээд явагдаж байна. Тухайн тэмцээнд хамт оролцсон албан хаагчид бүгд цочролын байдалтай байна. Тиймээс хэвлэл мэдээллийн хэрэгслээр янз бүрийн мэдээлэл гаргахгүй байхыг хүсч байгаа" гэх хариултыг өгсөн юм.

Харин амь насаа алдаад байгаа гэгдэх хурандаагийн хувьд ташаа мэдээлэл гэдгийг хэллээ. Хурандаа Н.Баярмагнайгийн хувьд бага тамирчдаа удирдахаас өмнө даралт нь ихэсч эмнэлэгт хүргэгдсэн бөгөөд томилгоог өөрчилсөн аж.