ТӨРИЙН ӨМЧИЙН ЦЭЦЭРЛЭГТ ХҮҮХДИЙГ ЦАХИМААР БҮРТГЭДЭГ БОЛОХ БОЛОЛТОЙ

Хүүхдээ цэцэрлэгт бүртгүүлэх нь иргэдийн хувьд тулгамдсан асуудлуудынх нь нэг хэсэг болоод удаж байна. Олон хоногийн турш цэцэрлэгийн гадна хонон өнжин байж бүртгүүлдэг, бүдүүлэг гэмээр асуудал гардаг. Мэдээж тулгамдсан асуудал төрийн бодлого байхгүй байгааг л илтгэж буй хэрэг юм.

Тэгвэл энэ жил эцэг эхчүүд хөнжил гудсаа тэврэн цэцэрлэгийн гадна хонохгүйгээр хүүхдээ бүртгүүлэх боломж бүрдэж байгаа бололтой. Өчигдөр Нийслэлийн Засаг даргын зөвлөлийн ээлжит хуралдаанаас нийслэлийн төрийн өмчийн цэцэрлэгт хүүхдийн бүртгэлийг цахим хэлбэрээр зохион байгуулах тухай хэлэлцсэн байна.

Цахим хэлбэрээр бүртгэл хийснээр цэцэрлэгт хүүхдээ бүртгүүлэх гэж урт дараалал үүсдэг, цэцэрлэгийн гадаа хонон өнжин дугаарладаг гэх мэт хүндэрэл үгүй болох юм. Мөн тухайн жилд харьяа дүүргийн цэцэрлэгт хэдэн хүүхэд шинээр болон нэмж авах, хэдэн хүүхэд бүртгэж авсан зэрэг мэдээлэл ил тод болж байгаа зэрэг олон давуу талтай аж. Зөвлөлийн хурлаар уг асуудлыг хэлэлцэн дэмжээд НИТХ-д өргөн барихаар боллоо.

Мөн хуралдаанаар "Улаанбаатарт үйлдвэрлэв"дэд хөтөлбөр, "Орон нутгийн үйлдвэрлэлийн түншлэл" дэд хөтөлбөр, "Аялал жуулчлалыг хөгжүүлэх дэд хөтөлбөр", "Хүүхдийн насны онцлогт тохирсон хөгжлийг дэмжих дэд хөтөлбөр"зэрэг нийт зургаан асуудлыг хэлэлцэж НИТХ-ын нэгдсэн хуралдаанд өргөн барихаар болсон байна.

Н.Батаа