ХӨСҮТ: 200 оношлуурын 100 нь үлдсэн

БНХАУ-ын Эрүүл мэндийн үндэсний комиссоос титэм вирусийг тархалтын талаарх хамгийн сүүлийн үеийн мэдээг гаргасныг “Синьхуа” агентлаг уламжилсан байна. Хоёрдугаар сарын 4-ний байдлаар Хятадад шинээр халдвар авсан 3225 тохиолдлыг бүртгэсэн бол 64 хүн энэ халдварын улмаас нас барсан байна. Ахин 5000 хүн вирусийн халдвар авсан байж болзошгүй гэсэн сэжигтэйгээр эмчийн хяналтад оржээ. Мөн сүүлийн нэг хоногийн дотор 492 хүний өвчний явц хүндэрсэн бол 157 хүн эдгэрч гарчээ.

ДЭМБ-ын халдварт өвчин хариуцсан мэргэжилтэн О.Ариунтуяа:

-Монголд корона вирусийн бүртгэл илрээгүй хэвээр байна. БНХАУ болон 23 улсад бүртгэгдсэн хэвээр байна. Шинээр өөр улсад илрээгүй. Хятадаас өөр улсаас илэрсэн бүх тохиолдол нь Хятадаар айлчлаад ирсэн хүмүүс байна. Манай улсад цөөн тооны хувийн хамгаалах хэрэгслийг дараа долоо хоногийн дундуур өгнө.

ГХЯ-ы офисын газрын захирал Л.Мөнхтүшиг:

-ГХЯ нь зөвхөн Хятад гэлтгүй дэлхийн бүх улс оронд корона вирусийн халдвараас хамгаалах дээр ажиллаж байна. Өнөөдөр Хятад дах манай консулын газар н голомтын бус газар нутагт байгаа монголчуудыг татан авах дээр нь дэмжлэг үзүүлээд ажиллаж байна.  БНХАУ-ын хил 1дүгээр сарын 28-нд Цагаан сарынх нь баярын дараа нээгдсэн. Үүнээс хойш өнөөдрийг хүртэлх хугацаанд 5208 иргэн БНХАУ-тай хиллэдэг бүх л боомтуудаар нэвтэрч орж ирсэн. Яг одоо Эрээн хотод МУ-ын 150 иргэн буцах хүсэлтээ өгөөд хүлээж байна. Яг одоо ХЕГ-тай хамтраад эдгээр 150 иргэнийг хилээр нэвтрүүлэх арга хэмжээг авч байна. Өчигдөр Гашуунсухайтаар МУ-ын 100 орчим иргэн орж ирсэн. Хоёрдугаар сарын таванд хилийн боомтууд хаагдахаар агаарын болон төмөр замын тээврээр иргэдээ буцаан татах ажлаа үргэлжлүүлэх болно.

Гадаадад байгаа иргэд МУ-ын Элчин сайдын яаманд бүртгүүлэх хэрэгтэй гэж уриалж байна. Бүртгүүлснээр мэдээ мэдээллийг шуурхай хүргүүлэх, учирч болзошгүй эрсдэлээс сэргийлэхэд чухал ач холбогдолтой. Ийм учраас идэвхтэй бүртгүүлэхийг уриалж байгаа юм.

УМХ-ын ахлах байцаагч Т.Төмөрбаатар

-Боомтуудаар 64 сэжигтэй тохиолдол илрүүлсэн. Бүдийг тусгаарлаж шинжилгээ авсан. Бүгдээс нь илрээгүй. Манайд 13 боомт байдгаас  5 нь түр хаагдсан. Иргэдийн гар тээшийг нарийн шалгаж байгаа. Ер нь хүнсний бүтээгдэхүүний хяналтыг сайжруулах талаар холбогдох яамд, газруудтай хамтран ажиллаж эхэлж байгаа. Чингэлэг, ачаа тээшийг ариутгах арга хэмжээ авч байна. Гар тээшээрээ хүнсний бүтээгдэхүүн авч орж ирэхгүй байхыг анхааруулж байна. Хилийн боомтууд дээр ажиллаж байгаа хүмүүсийн хувийн хамгаалах хэрэгслийн асуудлыг шийдсэн. ДЭМБ-д хүсэлт тавиад хоёрдугаар сарын 8-нд хоёр суурин термокамер байршуулахаар болсон.

ХӨСҮТ-ийн захирал Д.Нямхүү:

-Японоос ирсэн 200 оношлуураас 100 нь үлдсэн байгаа. Дараагийн долоо хоногоос 3000 оношлуур орж ирнэ.