ХНХ-ын сайдын томилгоог арваннэгдүгээр сарын 15-наас хойш хэлэлцэнэ

ХНХ-ын сайд Д.Сарангэрэлийг чөлөөлсөнтэй холбоотойгоор МАН-ын гишүүд дахин нэг сайдын марафонд битүүхэн гүйлдэж эхэлсэн. УИХ-ын гишүүн давхар дээл хаших боломжтой хууль эрхзүйн орчин бий болсон учраас гишүүд бүрт сайд болох хүсэл нууцхан. Ямартай ч сайдад тавигдах шаардлага нь тодорхой болсон. УИХ-д хоёр удаа сонгогдсон мөн аль нэг байнгын хорооны даргаар ажиллаж байсан гэсэн шалгуурыг тавьж буй учраас парламентад хоёр удаа сонгогдсон гишүүдийн хувьд нэг шат ойртсон гэсэн үг. 

Эдийн засгийн энэ хямралын үед хөдөлмөрийн зах зээлийн бүхий л харилцааг зохицуулах салбарыг удирдана гэдэг тийм ч амар даваа биш байх нь лавтай. Хамгийн их "галтай" энэ салбарт эв эеийг олчихдог байх чадвартайгаас гадна шийдэмгий, шинэчлэлт хийх хүн хэрэгтэй. 

Ялангуяа үе үеийн улстөрчдийн попролын сэдэв болох тэтгэврийн шинэчлэлтийг зоригтой эхлүүлэх хүн байх ёстой.  

Одоогоор хэд хэдэн хүн ХНХ-ын сайдад яригдаж байгаа юм. Тухайлбал, УИХ-ын гишүүн С.Чинзориг гурав дахь удаагаа сайдаар нь  очихоор өөрийгөө зүтгүүлж байгаа гэх. Түүний хувьд өмнө нь ХНХ-ын сайдаар хоёр ч удаа ажиллаж байсан ч хангалттай сайн ажиллаагүй. Хувь улстөрчийнхөө хувьд хэтэрхий бөөрөнхий, хуучинсаг. Нөгөөтэйгүүр сайд байх хугацаандаа хангалттай сайн ажиллаж чадаагүй хүнээс дахин юу ч хүлээх хэрэггүй биз ээ. 

Мөн хэд хэдэн эмэгтэй улстөрчийн нэр дуулдаж байгаагийн дунд өмнөх сайд А.Ариунзаяаг буцаан томилж магадгүй гэсэн мэдээлэл байгаа юм. Одоогоор МАН-ын удирдлагууд сайдын томилгоог түр хойшлуулж, ирэх оны төсвийг баталсны дараа буюу арваннэгдүгээр сарын`15-наас хойш томилгоог оруулж ирэхээр тогтжээ.

Тэр хүртэл горилогчдын тоо ч нэмэгдэж, намын удирдлагуудынхаа таалалд нийцэхээр гүйлдэх нь тодорхой. 

Түүнчлэн АН-ыг Засагт оруулна гэх яриа албан бусаар яригдаад удаж буй. Гэвч үүнийг АН, МАН-ын аль аль нь үгүйсгэсэн. Хэрэв сайдыг нь солих яам үлдсэн бол дээрх хугацаанд мөн шийдвэрлэнэ гэсэн үг.